एजेन्सी

पेरिस । आयोजक फ्रान्सलाई पराजित गर्दै पोर्चुगलले पहिलोपटक युरोपियन च्याम्पियनसिप (युरोकप) फुटबलको उपाधि जितेको छ । पेरीसस्थित स्टेड डी फ्रान्स रंगशालामा भएको फाइनलमा अतिरिक्त समयमा फ्रान्सलाई १ / ० ले पराजित गर्दै पोर्चुगलले १५ औ संस्करणको युरोकप उपाधि जितेको हो ।

पोर्चुगलको जितमा एक मात्र निर्णायक गोल इडेरले गरे । निर्धारित ९० मिनेट गोल रहित बराबरीमा सकिएपछि थपिएको समयमा गोल गर्दै पोर्चुगलले उपाधि जितेको हो । अतिरिक्त समयको १०९ औ मिनेटमा इडरले एकल प्रयासबाट गोल गर्दै पोर्चुगललाई ऐतिहासिक उपाधि दिलाए ।

पोर्चुगलले यसअघि २००४ मा घरमै आयोजना भएको खेलमा ग्रिससँग हारेपछि दोस्रो स्थानमा चित्त बुझाउनुपरेको थियो । त्यसपछि पोर्चुगलले युरोकपको फाइनलसम्म पुगेको थिएँ । यता घरेलु भूमीमा भएको युरोकप जित्ने फ्रान्सको सपना पुरा हुन् सकेन । त्यस्तै फ्रान्सको युरोकपको उपाधि तेस्रोपटक जित्ने योजना विफल भयो ।

खेलमा पोर्चुगलबिरुद्ध बल पोजिसनमा पकड बनाएपनि फ्रान्सले उपाधि जित्न सकेन । त्यस्तै फ्रान्सले क्रिष्टियानो रोनाल्डोबिनाको पोर्चुगललाई हराउन सकेन । पहिलो हाफको २५ औ मिनेटमा पोर्चुगलको क्रिष्टियानो रोनाल्डो घाइते हुदै मैदानबाट बाहिरिएपछि फ्रान्सले खेल एकतर्फी बनाएको थियो ।

तर, फ्रान्सले गोल गर्न सकेनन ।  फ्रान्सका दिमित्री पाएटसंग ठोक्किएपछि रोनाल्डो घाइते भएका थिए । र, घुडाको इन्जुरी भएका रोनाल्डोलाइ प्राथमिक उपचार गरिएको थियो । तर, प्राथमिक उपचारले पनि रोनाल्डोको इन्जुरी ठिक नभएपछि रोनाल्डो रुँदै मैदानबाट बाहिरिएका थिए ।

खेल अवधिभर फ्रान्सले केहि गोलको अवसर पाएको थियो ।  तर, एन्टोनी ग्रीजम्यान, ओलिभर जिरुड, दिमित्री पाएटको केहि उत्कृष्ट प्रहार पोर्चुगलका किपरले बचाएका थिए । खेलको अन्तिम समयमा फ्रान्सका गिगनाकको प्रहार पोस्टमा लागेर फर्किदा खेलको ९० मिनेट गोलरहित बराबरीमा सकिएको थियो । त्यस्तै पोर्चुगलका नानी, क्वारीस्माको केहि उत्कृष्ट प्रहार फ्रान्सका किपरले बचाएका थिए ।