काठमाडौं । निर्मला पन्तको हत्या प्रकरण अनुसन्धानका लागि गठित उच्चस्तरीय समितिका सदस्य वीरेन्द्र केसीमाथि आक्रमणमा संग्लन भएको आरोपमा ६ जना पक्राउ परेका छन् ।
केसी आइतबारमात्रै काठमाडौंबाट कैलाली पुगेका थिए । जिल्ला प्रहरी कार्यालय कैलाली एसपी विनोद घिमिरेले केसीमाथीको आक्रमण बन्दकर्ताबाट भएको बताए । ‘‘प्रदेश राजधानीको विषयलाई लिएर धनगढी बन्द थियो । बन्दकर्ताले अर्को एक सरकारी गाडीमा पनि तोडफोड गरेका छन् । उहाँ (केसी) को गाडीमा पनि बन्दकर्ताले नै ढुङ्गा प्रहार गरेका हुन्,’’ एसपी घिमिरेले भने ।
केसी सवार गाडीमा प्रदेश नम्बर ७ को कानुन मन्त्रालयको बा १ झ ९७०३ गाडीमा ढुङ्गा प्रहारबाट सीसा फुटेको छ । “अगाडिबाट रोकेर ढुङ्गा प्रहार गरे । मसँग २ जना सुरक्षाकर्मी र एकजना कानुन अघिकृत पनि थिए,” केसीले बाह्रखरीसँग कुरा गर्दै भने ।
धनगढीमा प्रदेश राजधानीको माग गर्दै बन्द आह्वान गरिएको छ ।
