काठमाडौं । नेपालका प्रिन्स दाहाल दुवई जुनियर इन्टरनेसनल सिरिजअन्तर्गतको पुरुष यु–१५ तर्फ सेमिफाइनलमा प्रवेश गरेका छन् । दुवईमा शुक्रबार भएको क्वाटरफाइनलमा आयोजक देश युएईका नवहान नाजिवलाई २–० को सोझो सेटमा पराजित गर्दै सिरिजको अन्तिम चारमा पुग्न सफल भएका हुन् । उनले नाजिवमाथि २१–१०, २१–१३ को सहज जित निकाल्न सफल भए । यसअघि शुक्रबारै भएको प्रि–क्वाटरफाइनलमा युएईंकै धनवान्थ राहभानलाई २१–२, २१–८ ले पराजित गर्दै अन्तिम आठमा पुग्न सफल भएका थिए ।
उच्च प्रदर्शन गरेका प्रिन्सलाई दुवईंमा बसोबास गर्दै आएका पाल्पाका पूर्व राष्ट्रिय ब्याडमिन्टन खेलाडी सुमन उदयले योनेक्सको नयाँ प्रविधिको र्याकेट प्रदान गरेका छन् । अब प्रिन्सले सेमिफाइनलमा भारतका आयन बोर्चेटियाको सामना गर्नेछन् ।
बुधबारबाट शुरु भएको सिरिज आइतबारसम्म चल्नेछ । सिरिजमा इन्डोनेसिया, भारत, पाकिस्तान, स्वीडेन, इंग्ल्यान्ड, केन्या, इजिप्ट, युएई साउदी अरब, बहराइन, अल्जेरयाका खेलाडीले सहभागिता जनाएका छन् ।