काठमाडौं । रेलिगेसन नहुने भए पनि नेपाली फुटबलको मेरुदण्ड मानिने सहिद स्मारक ‘ए’ डिभिजन लिग आउन मात्र पाँच दिन बाँकी रहँदा राष्ट्रिय टोलीका फरवार्ड विमल घर्तिमगरको क्लब अझै टुंगो लागेको छैन । प्रतियोगितामा सहभागी १४ क्लबहरुले पहिलो चरणको खेलाडी दर्ता सकिसकेका छन् । र अहिले दोस्रो चरणको खेलाडी दर्ता प्रकृयामा छन् । लिगकै लागि क्लबहरुले प्रशिक्षण सुरु गरिसकेका छन् । नयाँ खेलाडी र प्रशिक्षक ल्याएर तयारी भइरहँदा राष्ट्रिय टोलीका नियमित सदस्य विमलले कुन क्लबबाट खेल्छन् भन्ने टुंगो लागेको छैन । 

कुन क्लबबाट खेल्ने निश्चित नभएकैले उनी अहिले राष्ट्रिय टोलीबाट बंगबन्धु कपको तयारीमा जुटेका छन् । पछिल्लो समय विमलले थ्री स्टार क्लबबाट खेलेका थिए । तर, थ्री स्टारले लिगका लागि घोषणा गरेको टोलीमा विमल अट्न सकेका छैनन् । रेलिगेसन नहुने भएकाले पनि क्लबहरु खेलाडीका लागि धेरै रकम खर्च गर्न खोजिरहेका छैनन् । यसको राम्रो उदाहरण हुन्, विमल । थ्री स्टारका एक उच्च अधिकारीका अनुसार विमलले चर्को मूल्य मागेका कारण क्लबले अनुबन्ध नगरेको हो । तथापि थ्रीस्टार बाहेक पनि विमलको अन्य क्लबहरुसँग कुरा भइरहेको छ । तर, त्यसले सार्थकता भने पाउन सकेको छैन । 

बंगलादेशविरुद्धको फ्रि किकसहित साफ च्याम्पियनसिपमा दुई गोल गरेका विमलले आफु लयमै रहेको पुष्टि गरिसकेका छन् । तापनि क्लबहरु उनलाई मोटो रकममा भित्र्याउन इच्छा गरिरहेका छैनन् । विमल भन्छन्, “केही ठूला क्लबहरुसँग छलफल भइरहेको छ । केही दिनमै टुंगो लाग्छ ।” 

राष्ट्रिय टोलीेबाट डेब्यू गरेकै खेलमा गोल गरेपछि विमल एकाएक चर्चामा आएका थिए । उनले घरेलु मैदानमै आयोजित २०१३ को साफ च्याम्पियनसिपमा पाकिस्तानबिरुद्ध गोल गरेका थिए । इन्जुरी समयमा विमलले गरेको गोलमा नेपालले पाकिस्तानलाई १–१ को बराबरीमा रोकेको थियो । पाकिस्तानबिरुद्धको गोलपछि एक्कासी नेपाली फुटबलमा उदाएका विमलले विभिन्न उमेर समूहमा नेपालको प्रतिनिधित्व गरिसकेका छन् । यु–१४ हुँदै राष्ट्रिय टोलीमा स्थान बनाएका विमलले राष्ट्रिय टोलीबाट ३० खेलमा ८ गोल गरिसकेका छन् । 

विमलकै कप्तानीमा नेपाल यु–१९ साफ च्याम्पियनसिप भएको थियो । नवलपरासीमा जन्मेका २० वर्षे विमलले अघिल्लो सिजन भारतीय क्लब मोहन बगानबाट खेलेका थिए । उनले बेल्जियमको आरएससी एन्डरलेच्ट र नेदरल्यान्डको एफसी ट्वान्टी २० बाट पनि उमेर समूहमा खेलेका थिए । उनले स्पेनको मार्बेला एफसीमा पनि केही समय बिताएका थिए ।