काठमाडौं । ९१ औं अस्कर अवार्डमा नेपालबाट चलचित्र ‘पञ्चायत’ भिड्ने अवसर पाउने भएको छ । ‘पञ्चायत’ ले अस्कर अवार्डमा ‘उत्कृष्ट विदेशीभाषी फिल्म’ को विधामा प्रतिस्पर्धा गर्नेछ ।
अमेरिकाको एकेडेमी अफ मोसन पिक्चर आट्र्स एन्ड साइन्सेस (अम्पास)द्वारा मान्यताप्राप्त नेपालको छनोट समितिले ‘पञ्चायत’ लाई छनोट गरेको हो ।
‘पञ्चायत’ ५ दशक अगाडिको पञ्चायती व्यबस्थाभित्रको सामाजिक संरचना र उक्त समयका किशोरीहरुको यौन मनोविज्ञानलाई समाजले हेर्ने दृष्टिकोणलाई केन्द्रीय कथानक बनाएर निर्माण गरिएको चलचित्र हो ।
शिवम अधिकारीले निर्देशन गरेको ‘पञ्चायत’ मा निता ढुङ्गाना, सरोज खनाल, रूपा राना, गणेश गिरीलगायत मुख्य कलाकारका रुपमा रहेका छन् ।
अस्करमा छनोटका लागि ‘पञ्चायत’सँगै ‘तान्द्रो’ ‘माई लभ’ले आवेदन दिएका थिए । समितिले तीनवटै चलचित्र मापदण्ड भित्र रहेर बनेका स्तरीय रहे पनि प्राविधिक पक्ष, कथ्यको प्रस्तुति पक्ष, चरित्रहरूको भावनात्मक विश्लेषण तथा प्रस्तुतिका हिसावले ‘पञ्चायत’ छनोटमा परेको प्रेस विज्ञप्तिमा जनाएको छ ।
अस्कर अवार्ड २०१९ फेब्रुअरी २४ तारिखमा अमेरिकाको लस्एन्जेलसमा हुनेछ ।
यो चलचित्रले सन् २०१७ मा सन् फ्रान्सिस्को इन्टरनेशनल न्यू कन्सेप्ट फिल्म फेष्टिवलमा वेस्ट फरेन ल्यांग्वेज फिचर र वेष्ट एक्ट्रेस अवार्ड जितेको थियो ।