काठमाडौं । गायिका सितु खरेलद्वारा गाइएको गीतहरुको संग्रह ‘म जस्तै तिमी पनि’ गीति एल्बम सार्वजनिक गरिएको छ । लोकार्पित उक्त गीति एल्बम गायिका खरेलको सातौं गीति संग्रह हो ।
बुधबार काठमाडौंमा आयोजित एक कार्यक्रममा गायिका खरेलका पति संचारकर्मी सुमन खरेलले उक्त गीति संग्रहको लोकार्पण गरेका थिए । सितु खरेलद्वारा गाइएको उक्त एल्बमका सबै गीत बेलायतका लागि नेपाली राजदूत कवि तथा साहित्यकार डा. दुवसु क्षेत्रीले लेखेका हुन् ।
सार्वजनिक गीति एलबममा छ वटा गीत संगृहित छन् । ती गीत संगीतकार न्ह्यु बज्राचार्य, सचिन सिंह, प्रभुराज ढकाल, चण्डीप्रसाद काफ्ले, हरि लम्साल र कर्णदासले संगीतबद्ध गरेका छन् । एल्बम बिन्धवासिनी म्युजिकले बजारमा ल्याएको हो ।
गायिका सितु खरेलले छ वर्षसम्म भारतीय विद्या भवन, लण्डनबाट संगीतको शिक्षा हासिल गरेकी छिन् । उनले प्रख्यात संगीत विद्यालय ट्रिनीटी कलेज, बेलायतबाट भारतीय शास्त्रीय संगीतमा चार वर्षको पूर्णकालिन शिक्षा पनि हासिल गरेकी छिन् ।
पाँच दर्जनभन्दा बढी गीत गाइसकेकी गायिका खरेलले आफ्ना हरेक एल्बमबाट आर्जित आम्दानी सुस्त मनस्थिति भएका बालिकाहरुको सेवाका लागि समर्पण गर्दै आएकी छिन् ।
गायिका खरेलले आफूले गीत गायनबाट आएको आर्जन समाज सेवामा खर्च गर्दै आएको बताइन् । बाह्रखरीसित कुरा गर्दै उनले लोकार्पित एल्बमको बिक्रीबाट आएको रकम मानव सेवा आश्रममार्फत् समाजसेवाका क्षेत्रमा लगाउने जानकारी दिइन् ।