एजेन्सी ।  रुसमा सम्पन्न २१ औं संस्करणको विश्वकप फुटबलले नयाँ हलचल ल्यायो । उपाधि जित्ने आकलन गरिएका ठूला भनिएका टिमको कमजोर प्रदर्शन र साना टिमको उत्कृष्ट प्रदर्शनले विश्वकपमा रोमाञ्चकता थप्यो । फुटबलले सधैँ एउटै मोड लिँदैन अर्थात एकपछि अर्को राष्ट्र फुटबलमा बलियो भइरहेको रुस विश्वकपबाट प्रमाणित भएको छ ।
स्टार खेलाडीको कमजोर र नयाँ खेलाडीको उत्कृष्ट प्रदर्शनले विश्वकपमा नयाँपन दियो ।  गत सिजनको साबिक विजेता स्पेनको हार अनि अर्जेन्टिना, उरुग्वे र बाज्रिलको पराजयले विश्वकप फुटबलले नयाँ मोड लियो । लियोनल मेस्सी लगायतका स्टार खेलाडीको कमजोर प्रदर्शनसँगै केही स्टारको उदय पनि भयो रुस विश्वकपबाट । 
रुस विश्वकपले युवास्टारका रुपमा केलिन एमबाप्पेलाई जन्म दियो भने फुटबलमा जिवन समर्पित गरेका लुका मोड्रिचलाई चर्चामा ल्यायो । विश्वकपमा पुरस्कृत अनि चर्चामा आएका खेलाडीले आफु आवद्ध क्लबबाट यो सिजनको सुरुवातमा कस्तो प्रदर्शन गरिरहेका छन त  ? 
 
केलिन एमबाप्पे (उत्कृष्ट युवा खेलाडी)

रुस विश्वकपमा सर्वाधिक चर्चा पाएका खेलाडी हुन् फ्रान्सका केलियन एमबाप्पे । सानो उमेरमा विश्वकप खेल्ने अवसर पाएका डिफेन्डर एमबाप्पेले आफुलाई प्रमाणित गरे । रुस विश्वकपमा कान्छा खेलाडीको दोस्रो नम्बरमा परेका एमबाप्पेले डेब्यु विश्वकपमा टोलीलाई उपाधि जिताउन महत्वपूर्ण भूमिका खेले । उमेर समुह हुँदै राष्ट्रिय टोलीमा स्थान बनाएका उनले रुस विश्वकपमा ४ गोल गरे । समूह चरणमा पेरुविरुद्ध १ गोल गरेका उनले क्वाटरफाइनलमा अर्जेन्टिनालाई पराजित गर्न दुई र फाइनलमा क्रोएसियाविरुद्ध एक गोल गरेका थिए । विश्वकपमा उत्कृष्ट युवा खेलाडीको अवार्ड पाएका एमबाप्पेले तीव्र गतिमा कुद्न सक्ने खेलाडीको उपनाम पाएका छन् । विश्वकप फुटबलबाट आएको पैसा अनाथ बालबालिकालाई प्रदान गरेका उनले क्लबमा पनि उत्कृृष्ट प्रदर्शन गरिरहेका छन् । एमबाप्पे जर्मन क्लब पीएसजीबाट व्यवसायीक फुटबल खेल्छन् । विश्वकपपछि सुरु भएको यो सिजनको लिग वानमा उनले ३ खेलमा ४ गोल गरिसकेका छन् । 

लुका मोड्रिच (उत्कृष्ट खेलाडी)

रुस विश्वकपमा सर्वाधिक चर्चामा आएका खेलाडी हुन् क्रोएसियाका कप्तान लुका मोड्रिच । दुःख कष्ट सहँदै फुटबलमा रमाएका मोड्रिच विश्वकप फुटबलमा उत्कृष्ट खेलाडी भए । क्रोएसियालाई फाइनलसम्म पुर्याउन महत्वपूर्ण योगदान दिएका मोड्रिचले समूहचरणमा नाइजेरियाविरुद्ध पेनाल्टीमा र डेनमार्कविरुद्ध १ गोल गरी समग्रमा दुई गोल गरे । लामो समयपछिको सहभागितामा टोलीलाई फाइनलमा पुर्याएका मोड्रिचले विभिन्न उमेर समूह हुँदै २००६ मा राष्ट्रिय टोलीमा डेब्यु गरेका थिए । ३३ वर्षीय स्टार मोड्रिचले क्रोएसियाका लागि १ सय १५ अन्तर्राष्ट्रिय खेलमा १४ गोल गरेका छन् । क्रोएसियाको यु–१५ टिमबाट उनी जोडिएका थिए । २०१२ बाट स्पेनिस क्लब रियल मड्रिडमा आवद्ध भएका उनले १ सय ७० खेलमा ९ गोल गरेका छन् । मोड्रिचले यो सिजनमा रियल मड्रिडमा ४ खेल खेल्दा गोल गर्न सकेका छैनन् । 

ह्यारी केन (सर्वाधिक गोलकर्ता )

सर्वाधिक गोलसँगै विश्वकपमा गोल्डेन बुट पाएका इङल्यान्डका ह्यारी केनले पनि रुस विश्वकर्मामा राम्रै चर्चा पाए । ६ गोल गर्दै २१ औ संस्करणको विश्वकपमा गोल्डेन बुट जितेर नाम दर्ता गरेका ह्यारीले इंग्लिस क्लब टोट्नह्याममा उत्कृष्ट खेल्दै आएका छन् । टोट्नह्याम हट्सपरबाट विभिन्न क्लब गएका उनी अहिले टोट्नह्यामबाट खेलिरहेका छन् । २०१० मा यु–१७ बाट खेल्दै इङल्यान्डको फुटबलमा आएका उनले २०१५ मा राष्ट्रिय टिममा खेल्ने अवसर पाए । 
सिनियर टिमबाट ३२ अन्तर्राष्ट्रिय खेल खेलेका उनले १९ गोल गरेका छन् । रुस विश्वकपमा टिमलाई चौथो स्थानमा पुर्याउन महत्वपूर्ण योगदान दिएका केनले आफनो क्लब टोटनह्यामका लागि १ सय ५५ खेलमा १ सय १० गोल गरेका छन् । रुस विश्वकपमा जम्मा ५ सय ७३ मिनेट खेलेका केनले गोलका लागि १३ प्रहार गरेका थिए । 

थिवाउट निकोलस (उत्कृष्ट गोलकिपर)

रुस विश्वकपमा उत्कृष्ट गोलकिपर घोषित भए बेल्जियमका थिवाउट निकोलस । टोलीलाई तेस्रो स्थानमा पुर्याउन विपक्षीका धेरै प्रहार रोकेका उनले उत्कृष्ट गोलकिपरको अर्वाडसँग सुनको ‘ग्लोभ्स’ पाए । टोलीमा ५० प्रतिशत रक्षक भूमिकालाई उनले पुर्णतया निभाए । २६ वर्षका थिवाउटले यु–१८ हुँदै २०११ मा राष्ट्रिय टोलीमा गोलरक्षक भूमिका पाए । त्यसयता टोलीको सुखद नतिजामा हातेमालो गरिरहेका उनले ६७ अन्तर्राष्ट्रिय खेल खेलेका छन् । २५ नम्बरको जर्सि लगाएर थिवाउटले स्पेनिस महारथी क्लब रियल मड्रिडबाट ब्यबसायिक फुटबल खेलिरहेका छन् । विपक्षीका कडा प्रहार रोक्ने गोलकिपरको पहिचान बनाएका थिवाउट यसैसिजनबाट रियल मड्रिडमा आवद्ध भएका छन् । यसअघि चेल्सीमा थिए । चेल्सीबाट एथ्लेटिको मड्रिडमा लोनमा २०११ देखि १४ सम्म उनले १ सय ११ खेल खेले । 

रोमेलु लुकाकु

रुस विश्वकपमा ब्यापक चर्चा भएका अर्का खेलाडी हुन् बेल्जियमका रोमेलु लुकाकु । गरिब परिवारबाट दुःख झेलेर फुटबलमा आएका लुकाकुले विश्वकपमा ४ गोल गरे । उत्कृष्ट प्रदर्शनसहित बेल्जियमलाई तेस्रो स्थानमा पुर्याएका लुकाकुले समूह चरणमा पानामाविरुद्ध २ तथा ट्युनिसियाविरुद्ध दुईगोल गरेका थिए । २०१० बाट राष्ट्रिय टिममा स्थान बनाएका २५ वर्षीय स्टाइकर लुकाकुले विश्वकपमा दुईगोलका लागि सहयोग तथा जम्मा गोलपोष्टमा १९ प्रहार गरेका थिए । राष्ट्रिय टिमबाट ७७ अन्तर्राष्ट्रिय खेल खेलेका उनले ४३ गोल गरेका छन् । ९ नम्बरको जर्सि लगाउँदै म्यानचेष्टर युनाइटेडबाट व्यावसायिक फुटबल खेल्ने लुकाकुले ३९ खेलमा २० गोल गरेका छन् । म्याचेष्टर युनाइटेडअघि उनी २०१७ सम्म एभर्टनमा आवद्ध थिए । एभर्टनमा एक सिजन लोन र १ सिजन आवद्ध भएका लुकाकुले १ सय ४१ खेलमा ६९ गोल गरे । यो सिजनको प्रिमिएर लिगमा युनाइटेडबाट ५ खेलमा ४ गोल गरेका छन् ।  

इडेन हजार्ड 

अन्तर्राष्ट्रिय प्रतियोगिता वा क्लब स्तरका खेलमा चर्चामा आउने नाम हो इडेन हर्जाड । बेल्जियमको राष्ट्रिय टोलीका महत्वपूर्ण सदस्य इडेन हजार्डले चेल्सीसँगै बेल्जियमका लागि उत्कृष्ट खेलिरहेका छन् । रुसमा सम्पन्न विश्वकपमा ३ गोल गरेका हाजार्डले सिल्भर बल पुरस्कार पाएका थिए । ३ सय ३३ मिनेट खेलेका हजार्डले ३ गोलका साथै दुईगोलमा सहयोगी भूमिका खेले । विपक्षीको पोष्टमा १२ प्रहार गरेका उनले बेल्जियमलाई तेस्रो स्थानमा ल्याउन योगदान दिए । विभिन्न उमेर समूह हुँदै २००८ बाट राष्ट्रिय टोलीमा स्थान बनाएका इडेनले ९४ खेलमा २७ गोल गरेका छन् । चेल्सीबाट व्यवसायिक फुटबल खेल्दै आएका उनले २ सय १३ खेलमा ७४ गोल गरेका छन् । यो सिजन प्रिमिएर लिगमा उनले ५ खेलमा आफनो गोलसंख्या ५ पुर्याएका छन् । 

एन्टोनी ग्रिजम्यान

विश्वकप विजेता फ्रान्सका अर्का चर्चित खेलाडीको सूचीमा छन् एन्टोनी ग्रिजम्यान । विश्वकप उपाधि दिलाउन अहम भूमिका  खेलेका ग्रिजम्यान फ्रान्सका भरपर्दा खेलाडी हुन् । विश्वकपमा ४ गोल र दुई गोलमा सहयोगि भूमिका खेलेका ग्रिजम्यानले सिल्भर बुट पुरस्कार पाए । सन् २०१० मा यु–१९ टिम हुँदै फ्रान्सको फुटबलमा आएका ग्रिजम्यानले यु–२० र यू–२१ टिमबाट खेले । २०१४ बाट सिनियर टोलीमा स्थान बनाएका उनले ६३ खेलमा २४ गोल गरेका छन् । २७ वर्षीय फरवार्ड ग्रिजम्यान एथ्लेटिको मड्रिडमा आवद्ध छन् । २०१४ बाट एथ्लेटिको मड्रिडमा रहेका उनले १ सय ४५ खेलमा ८० गोल गरेका छन् । एथ्लेटिको मड्रिडअघि उनी रियल सोसिडाडमा थिए । यो सिजन एथ्लेटिको मड्रिडबाट उनले ला लिगा फुटबलमा २ खेलमा १ गोल गरेका छन् ।