एजेन्सी । मानिसहरुमा हुने विभिन्न किसिमका ‘फोबिया’ अर्थात् डर हटाउन अहिले चिकित्सकहरुले आधुनिक उपकरण ‘भर्चुअल रियालीटी’, भीआरको प्रयोगमा जोड दिइरहेका छन् । कुकुर, किरा, पानी, उचाइ, उडान लगायत विभिन्न फोबियाका कारण मानिसहरुमा धड्कन तीव्र हुने, स्वास प्रस्वासमा समस्या आउने, अत्याधिक पसिना आउने, मुख सुक्ने जस्ता लक्षण देखा पर्छन् । तर धेरै मानिसले कठोर उपचार प्रक्रियाका कारण आफ्ना फोबिया लुकाउने र लापरबाही गर्ने गरेको चिकित्सकहरुको भनाइ छ । जसले स्वास्थ्यमा झन ठूलो असर पुर्याउने र दिर्घकालीन समस्या निम्त्याउन सक्ने बताइएको हो ।

तर अहिले भने भिआरको प्रयोगले यसको उपचारलाई धेरै सहज र सुरक्षित बनाइदिएको समाचार एजेन्सी एसोसिएटेड प्रेसले जनाएको छ । भिआर एउटा यस्तो आधुनिक उपकरण हो जुन पहिरेपछि हामी कृत्रिम दुनियाँमा प्रवेश गर्दछौँ । हाम्रा अगाडिको दृश्य कृत्रिम भएपनि हामीले त्यसको वास्तविक अनुभव गर्ने गर्छौँ । यस्तोमा कसैलाई उचाइको फोबिया भएमा उसले उचो भवनसम्म पुगिरहनु परेन र केबल भिआरको मद्दतले बसिरहेको ठाउँलाई नै उच्च स्थान बनाइ डरको सामना गर्न सकिनेछ ।  

बनावटी भएपनि यो थेरापीले बिरामीहरुमा फोबियाको लक्षण बिस्तारै हटाउँदै राहत पुर्याउने गरेको बताइएको छ । साथै यो उपकरण हलुका, चलाउन सहज र वास्तविक उपचार भन्दा धेरै सस्तो भएकाले पनि पछिल्लो समय भिआरको प्रयोग बढ्दै गइरहेको बताइएको हो । आफूलाई डर लाग्ने वस्तुसँग बारम्बार सामना गरिरहँदा त्यसले बिस्तारै डर हटाउँदै लैजाने बताइएको छ । विशेषगरी बालबालिकाहरुका लागि यो थेरापी अत्यन्तै सुरक्षित र सहज मानिएको छ किनकी यसअघि बाबुआमाले उपचारका लागि छोराछोरीलाई उच्च स्थानमा छाड्न असहज मान्ने गरेका थिए । यसैकारण सामान्य फोबिया अब मानिसहरले चिकित्सकको सहयोग बिना घरैमा बसेर पनि ठीक गर्न सक्ने विशेषज्ञहरुको भनाइ छ । यसको प्रयोगले धेरै मानिसहरुको जीवन सहज बनाइसकेको छ । कुनैसमय सवारी चलाउन र विमान चढ्न असम्भव मान्ने मानिसहरु भिआरकै कारण आज सक्षम बन्न सकेको अनुसन्धानकर्ताहरुको भनाइ छ ।