काठमाडौं । लामो समयदेखि सुनसान रहेको दशरथ रंगशालामा सोमबार दिउँसो निकै चहलपहल थियो । अखिल नेपाल फुटबल संघ (एन्फा) ले सहिद स्मारक ‘ए’ डिभिजन लिगको ट्रफी प्रदर्शन गर्दा यस्तो चहलपहल देखिएको हो । ०७२ सालको भूकम्पपछि दशरथ रंगशाला पहिलोपटक तामझामका साथ खुला गरिएको थियो ।
सो अवसरमा एन्फाले ए डिभिजन लिगको ट्रफी सार्वजनिक गरेको थियो । कार्यक्रममा एन्फा अध्यक्ष कर्माछिरिङ शेर्पा, लिग कमिटी संयोजक विज्ञानराज शर्मा, राष्ट्रिय फुटबल टोलीका कप्तान विराज महर्जनलगायत उपस्थित थिए ।
उनीहरुसँगै मैदानमा थिए, विश्व निकेतन स्कुलका विद्यार्थी पनि । कार्यक्रममा एन्फा अध्यक्ष शेर्पाले विद्यार्थीहरुलाई फुटबलमा लाग्न सुझाए । उनले भने “अहिलेदेखि नै राम्रो खेलाडी बन्ने अठोट गर्नोस् ।” अध्यक्ष शेर्पाले विश्वमा राजनीति र धर्मले मानिसहरुलाई विभाजित गरेको भन्दै खेलले मानिसलाई जोड्न सहयोग गरेको बताए । विश्व निकेतन रंगशाला नजिकको पुरानो र धेरै खेलाडी उत्पादन गर्ने स्कुल भएकाले ट्रफी सार्वजनिक कार्यक्रममा त्यहीँका विद्यार्थी रोजाइमा परेको उनको भनाइ थियो । राष्ट्रिय टोलीका कप्तान विराज महर्जन विश्व निकेतन स्कुलकै उत्पादन हुन् ।
अध्यक्ष शेर्पाले पूर्वाधारको कमी भए पनि आउने वर्ष राष्ट्रिय लिग र एन्फा पे्रसिडेन्ट लिग गर्ने उनले बताए । यही वर्ष पुरुष र महिलाको अन्तर्राष्ट्रिय टुर्नामेन्ट गर्ने जानकारी दिए । सहिद स्मारक लिगले स्थायित्व पाउने प्रतिवद्धता उनले व्यक्त गरे ।