काठमाडौं । नेपाल प्रहरी महानिरीक्षक सर्वेन्द्र खनालले अप्ठेरो अवस्थाको चुनौती सामना गर्न महत्वपूर्ण भूमिका निर्वाह गर्दै आएको नेपाल प्रहरी विशेष कार्यदल प्रहरीको मेरुदण्ड भएको बताएका छन् । शुक्रबार केन्द्रीय प्रहरी विशेष कार्यदल कपनको निरीक्षणपछि खनालले यस्तो बताएका हुन ।
खनालले कार्यदल परिसरस्थित सिमुलाटोर, फायरिङ हल, व्यायम हल र कार्यदलको पेशागत क्रियाकलापको अवलोकनसँगै वृक्षारोपण समेत गरे । खनालले नेपाल प्रहरीको सदस्य भएर देश र राष्ट्रको सेवा गर्ने विशेष जिम्मेवारी प्राप्त भएको उल्लेख गर्दै अवसरको प्रयोग गर्न निर्देशन समेत दिए ।
प्रहरी कर्मचारीले जीवनका उर्जाशील समय नेपाल प्रहरी संगठनमै व्यतित गर्ने भएपछि आफ्नो जिम्मेवारीलाई महसुस गरेर देश र राष्ट्रको सेवा गरी परिवार, समाज र राष्ट्रको विश्वास जित्नु पर्नेमा खनालको जोड थियो ।
कार्यक्रममा प्रहरी नायव महानिरीक्षक धिरु बस्न्यातले कार्यदललाई अझै सक्षम र सबल बनाउन सीप, दक्षता र योग्यता अनुसार कटिबद्ध भएर कार्य गर्ने प्रतिबद्धता व्यक्त गरे । यस्तै कार्यदलका प्रमुख प्रहरी उपरीक्षक भरतबहादुर बोहराले भवन निर्माण सम्बन्धी प्रतिवेदन प्रस्तुत गर्दै नवनिर्मित भान्साघर कुल २९ लाख ९७ हजार १ सय ९ रुपैयाँको लागतमा निर्माण कार्य सम्पन्न भएको जानकारी दिए ।