काठमाडौं । माओवादी केन्द्रका अध्यक्ष पुष्मकमल दाहाल नेपालको ३९ औं प्रधानमन्त्रीका रूपमा निर्वाचित भएको ५१ दिन बितिसक्दा पनि दाहालसहित उनको क्याबिनेटका कुनै सदस्यले सम्पत्ति विवरण सार्वजनिक गरेका छैनन् । दाहाल गत साउन १९ गते संसद्बाट प्रधानमन्त्रीमा निर्वाचित भएका हुन् । 

दाहालका प्रमुख राजनीतिक सल्लाहकार चक्रपाणि खनालले मन्त्रीपरिषद्का सदस्यहरूले आफ्नो सम्पत्ति विवरण बुझाएको वा नबुझाएको बारे अनभिज्ञता प्रकट गरे । खनालले भने, “सम्पत्ति विवरण बुझाउनुभएको छैन र ! बुझाउनुपर्ने हो । किन नबुझाउनुभएको रहेछ, आज बुझ्छु ।”

यसअघिका प्रधानमन्त्री केपी ओलीसहित केही मन्त्रीहरूले १५ दिनभित्रै आफ्नो सम्पत्ति विवरण बुझाएको ओलीका प्रमुख राजनीतिक सल्लाहकार रहेका विष्णु रिमालले दाबी गरे । सम्पत्ति विवरण प्रधानमन्त्री तथा मन्त्रीपरिषद् कार्यालयको वेबसाइटमा राख्ने प्रचलन छ ।

प्रधानमन्त्रीमा निर्वाचित भएको दुई महिना बित्नै लाग्दा प्रधानमन्त्री दाहालसहित उनका मन्त्रीहरुले सम्पत्ति विवरण बुझाउन चासो देखाएका छैनन् । २०४८ सालमा गिरिजाप्रसाद कोइराला प्रधानमन्त्री हुँदा प्रधानमन्त्री तथा मन्त्रीहरूले सम्पत्ति विवरण बुझाउनुपर्ने निर्णय भएको थियो । निर्वाचित भएको १५ दिनभित्र प्रधानमन्त्रीसहित सम्पूर्ण मन्त्रीपरिषद् सदस्यहरुले आफ्नो सम्पत्ति विवरण बुझाउनुपर्ने निर्णय त्यसबेला भएअनुसार त्यसपछि बनेका सबै सरकारमा रहेकाहरुले सम्पत्ति विवरण सार्वजनिक गर्ने प्रचलन छ ।

पुष्पकमल दाहाल – प्रधानमन्त्री

विमेलेन्द्र निधि – उपप्रधान तथा गृहमन्त्री

कृष्णबहादुर महरा – उपप्रधान तथा अर्थमन्त्री

अर्जुननरसिंह केसी – सहरी विकास

रमेश लेखक – भौतिक पूर्वाधार तथा यातायात

जनार्दन शर्मा – ऊर्जा

डा. प्रकाशशरण महत – परराष्ट्र

बालकृष्ण खाँण – रक्षा 

दीपक बोहरा – आपूर्ति

सूर्यमान गुरुङ – श्रम तथा रोजगार

गौरीशंकर चौधरी – कृषि विकास

दलजित श्रीपाइली – युवा तथा खेलकुद

विक्रम पाण्डे – भूमिसुधार तथा व्यवस्था

जयदेव जोशी – जनसंख्या तथा वातावरण

हितराज पाण्डे – संघीय मामिला तथा स्थानीय विकास

सुरेन्द्रकुमार कार्की – सूचना तथा सञ्चार

धनिराम पौडेल – शिक्षा 

अजयशंकर नायक – कानुन, न्याय तथा संसदीय मामिला

केशवकुमार वुढाथोकी  – सामान्य प्रशासन

रोमी गौचन थकाली – वाणिज्य

सीतादेवी यादव – शान्ति तथा पुननिर्माण

जीवनबहादुर शाही – संस्कृति,पर्यटन तथा नागरिक उड्डयन

दीपक गिरी – सिँचाइ

नवीन्द्रराज जोशी – उद्योग

शंकर भण्डारी – वन तथा भू–संरक्षण

गगनकुमार थापा – स्वास्थ्य

हृदयराम थानी – सहकारी तथा गरिबी निवारण

श्रीप्रसाद जवेगु – संघीय मामलिा तथा स्थानीय विकास

सत्यनारायण भगत – ऊर्जा

राधिका तामा – कृषि विकास

धनमाया बिक – शिक्षा

तस्बिर स्रोत : प्रधानमन्त्री सचिवालय