काठमाडौं । नेकपा एमालेका अध्यक्ष केपी शर्मा ओलीले मुलुकलाई विखण्डन गर्न चाहने शक्तिले एमालेलाई नियोजित रूपमा कमजोर बनाउन लागिपरेको बताएका छन् ।

बुधबारबाट पार्टी मुख्यालयमा सुरु भएको सातौं केन्द्रीय कमिटीको बैठकमा उनले एमालेलाई आदीवासी जनजाती, मधेश विरोधी पार्टी भएको हौवा पिटाउँदै एमालेलाई कमजोर बनाउने खेल रचिएको दाबी गरे । 

सञ्चारकर्मीलाई खुला गरिएको बैठकको प्रारम्भमा उनले भने, “एमालेलाई सुरुदेखि नै आक्रमण गरिएको हो, संविधान निर्माणमा एमाले दृढतापूर्वक उभिएपछि विभिन्न राष्ट्रभित्र र बाहिरबाट विभिन्न खेल भए, एमालेलाई सरकार बनाउन नदिन ठूलो चलखेल भयो ।”

उनले एमाले नेतृत्वको सरकारलाई गिराएर आफ्नो स्वार्थ पूरा गर्ने खेलमा केही शक्ति लागि परेको समेत बताए । एमालेले एकढिक्का भएर त्यसको सामना गर्नेसमेत उद्घोष गरे । 

उनले पुष्पकमल दाहाल प्रचण्ड नेतृत्वको सरकारले निर्वाचन गराउनै नसक्ने र संविधान कार्यान्वयन गर्ने नसक्ने जिकिर दोहो¥याए । उनले भने, “हाम्रो नेतृत्वको सरकारले कार्यतालिका बनाएरै संविधान कार्यान्वयनको खाका तयार पारेको थियो, कानुन संशोधन र नयाँ कानुन निर्माणका आधार तयार पारिसकेको थियो । तर, यो सरकारलाई त्यसतर्फ कुनै रुची नै छैन ।”  उनले  ०७४ माघ ७ गतेसम्म तीनै तहको निर्वाचन नगरिए मुलुका राजनीतिक र संबैधानिक रिक्तता उत्पन्न हुने बताउँदै त्यसबेला के हुन्छ भन्ने चिन्ता कसैलाई नभएको बताए ।

प्रमुख प्रतिपक्षी दलका नेतासमेत रहेका अध्यक्ष ओलीले प्रधानमन्त्री प्रचण्डले विदेशी भूमिमा गएर नेपालको समस्या ब्रिफिङ गरेको बताए । प्रधानमन्त्री प्रचण्डले नेपालको आन्तरिक कुराहरू छरपष्ट पार्ने मात्रै होइन पार्टी र त्यसको नेतृत्वको नामै किटेर उहाँ त भारत विरोधी हो नि भन्नुभएको छ, उनको कथन थियो ।  उनले एमाले भारत विरोधी पार्टी नभएको जिकिर गर्दै नेपालको स्वभाविमान जोगाउनु कुनै देश विरुद्ध नभएको प्रष्ट पारे ।  पार्टी केन्द्रीय कमिटीको बैठकमा आज विभिन्न प्रतिवेदनहरू प्रस्तुत हुने एमालेले जनाएको छ । 

तस्बिर : रोजित खड्का