काठमाडौं । स्थानीय जनप्रतिनिधिले गाउँका डाँडामा जथाभावी डोजर चलाउँदा पहिरो जाने खतरा बढेको छ । बिहीबार बसेको केन्द्रीय संसद विकास समितिको बैठकमा उपस्थित सांसदले यस्तो खतरा बढेको बताएका छन् ।
नेपालका पूर्वी, मध्य र पश्चिमी सबै क्षेत्रका पहाडमा स्थानीय जनप्रतिनिधिले विकासमा नाममा आफूखुसी डोजर चलाउँदा पहिरोको खतरा बढेको साथै खानेपानीको मुहान र वनजङ्गलसमेत मासिने खतराको सम्भावना उच्च रहेको समस्या व्यक्त गरेका छन् । सांसद आशाकुमारी बिकले जनप्रतिनिधि र कतिपय केन्द्रीय सरकार मातहतकै निकायले सडक, पुल, पार्क आदि संरचना निर्माण गर्दा खानेपानीको मुहान, वितरण पाइप र प्राकृतिक स्रोत–साधनमा अधिक क्षति पुगेको बताइन् ।
सांसद यज्ञराज सुनुवारले गाउँमा सञ्चालित उपभोक्ता समितिको अध्यक्ष सडक विभागअन्तर्गतकै सरकारी हाकिम रहने र डोजर अप्रेटर इन्जिनियर बन्ने परिपाटी मौलाएको औंल्याए ।
“यस्तो तरिकाले पहाडहरु पहिरोको अधिक खतरामा छन्,” सांसद सुनुवारले भौतिक पूर्वाधार तथा यातायात मन्त्री रघुवीर महासेठसमक्ष भने, “यस्तो परिपाटीलाई नियन्त्रण र व्यवस्थित बनाउन ऐन र कार्यविधि निर्माणको पहल गरिदिनुपर्यो ।” जवाफमा मन्त्री महासेठले स्थानीय तहमा देखिएको यस्तो समस्या सीमित क्षेत्रको मात्रै समस्या नभएकाले भौतिक साथै सहरी विकास, संघीय मामिला र कानुन मन्त्रालयको समन्वयबाट प्रदेश सरकारसमेतको प्रयासबाट कडाइ गरिने बताए ।
