एजेन्सी

पेरीस । जर्मनीलाई पराजित गर्दै फ्रान्स घरेलु मैदानमा जारी युरोपियन च्याम्पियनसिप (युरोकप) फुटबलको फाइनलमा प्रवेश गरेको छ । दोस्रो सेमिफाइनलमा एन्टोनी ग्रीजम्यानले दुई गोल गरेपछि जर्मनीलाई २ – ० ले पराजित गर्दै आयोजक फ्रान्स फाइनलमा पुगेको हो ।

फ्रान्सले अब उपाधिका लागि पोर्चुगलको सामना गर्नेछ । पहिलो सेमिफाइनलमा वेल्सलाई पराजित गर्दै पोर्चुगल उपाधि नजिक पुगिसकेको छ । फाइनल खेल आगामी जुलाई १० मा (आइतबार) हुनेछ ।

यस्तै फ्रान्सले यो जितसंगै जर्मनीसंग सन् २०१४ को विश्वकपमा बेहोरेको हारको बदला समेत लिएको छ । ब्राजिल विश्वकपको क्वाटरफाइनलमा म्याट हुमेल्सले एक मात्र निर्णायक हेड गोल गरेपछि फ्रान्स जर्मनीसंग १ –० ले पराजित हुदै क्वाटरफाइनलबाट बाहिरिएको थियो । सेमिफाइनलमा रोकिएसंगै जर्मनीको चौथोपटक युरो जित्ने सपना अधुरो रह्यो । जर्मनीले सन् १९७२, १९८० र १९९६ गरी तीनपटक युरोकपको उपाधि उचालिसकेको छ ।

 

मार्सेलीस्थीत स्टेड भेलोड्रोम रंगशालामा भएको प्रतिस्प्रधात्मक खेलमा फ्रान्सले पेनाल्टी गोलबाट सुरुवाती अग्रता लिएको थियो । पहिलो हाफको इन्जुरी समयमा जर्मनीका कप्तान बाष्टियन स्वान्सटाइगरले पेनाल्टी एरियामा फल गरेपछि फ्रान्सले पेनाल्टीको अवसर पायो । उक्त पेनाल्टी अवसरलाइ  फ्रान्सका एन्टोनी ग्रीजम्यानले गोल गर्दै टोलीलाई अग्रता दिलाए । त्यसअघि दुवै टोलीले गोलको अवसर पाएपनि अन्य गोल गर्न सकेनन । पहिलो हाफको सुरुवाती १० मिनेटको खेल फ्रान्सले आफ्नो पक्षमा बनाएको थियो भने त्यसपछि जर्मनीले फ्रान्सलाई  दबाबमा राखेको थियो । तर, अन्तिम समयमा आफ्नै गल्तीको कारण जर्मनी पहिलो हाफमा १ – ० ले पछि पर्यो  ।

पहिलो हाफमा एक गोलले पछि परेको जर्मनी दोस्रो हाफको ७२ औ मिनेटमा  २ – ० ले पछि पर्यो । जर्मनीका डिफेन्सको फाइदा उठाउदै ग्रीजम्यानले व्यक्तिगत दोस्रो गोल गर्दै फ्रान्सको अग्रता दोब्बर बनाए । जर्मनीका डिफेन्सले बल क्लियर गर्न नसकेको बललाई नियन्त्रण लिदै पोग्वाले ग्रीजम्यानलाइ पास उपलब्ध गराएका थिए । त्यसपछि दुवै टोलीबाट गोल हुन् सकेन र खेल फ्रान्सले जित्यो ।

यता, जर्मनीलाई पराजित गर्ने क्रममा दुई गोल गरेका ग्रीजम्यानको जारी युरोकपमा यो छैटौ  गोल हो । गोल्डेन बुटका दाबेदार ग्रेजम्यान जारी युरोकपको सर्वाधिक गोल कर्ता पनि हुन् । ग्रीजम्यानपछि पोर्चुगलका क्रिष्टियानो रोनाल्डो ३ गोल गर्दै गोल्डेन बुटको दाबेदार हुन् ।