राजनीति
काठमाडौं । चारदिने भारत भ्रमणमा रहेका प्रधानमन्त्री पुष्पकमल दाहाल प्रचण्ड र भारतीय समकक्षी नरेन्द्र मोदीबीच आज महत्वपूर्ण भेटवार्ता हुने भएको छ ।
भारतीय प्रधानमन्त्री मोदीको निमन्त्रणामा दाहाल बिहीबार चार दिने भारत भ्रमणमा निस्किएका हुन् । भारतीय समय अनुसार दुई देशका प्रधानमन्त्रीबीच विहान साढे ११ बजेदेखि १२ बजेसम्म छुट्टै भेटवार्ता हुनेछ । त्यसपछि दुवै देशका प्रतिनिधिमण्डलस्तरीय औपचारिक वार्ता हुनेछ ।
आजै दुवै देशका प्रधानमन्त्रीले संयुक्त रूपमा पत्रकार सम्मेलन गर्नेछन् । दुई प्रधानमन्त्रीबीच पञ्चेश्वर बहुउद्देश्यीय परियोजनाका विस्तृत परियोजना विवरणलाई अन्तिम रुप दिइने, बंगलादेश पारबहन सुविधा प्रयोग गर्ने विषयमा छलफल हुने, उर्जा व्यापार सम्झौता, हुलाकी राजमार्ग निर्माण लगायतका विषयमा कुराकानी हुने बताइएको छ ।
त्यसैगरी प्रधानमन्त्री दाहालले आजै बेलुका ६ बजे राष्ट्रपति प्रणव मुखर्जीसँग शिष्टाचार भेटवार्ता गर्नेछन् । भारतीय उपराष्ट्रपति, विदेशमन्त्री लगायतसँग आजै भेटवार्ता गर्नेछन् ।
दाहालको भ्रमणमध्ये सबैभन्दा महत्वपूर्ण भेटवार्ता आजै हुनेछन् ।
प्रकाशित मिति: शुक्रबार, भदौ ३१, २०७३ ०८:०२
प्रतिक्रिया दिनुहोस्