उपत्यकाका केही निजी विद्यालयहरू सोमबार बन्द गरिए । केही विद्यार्थी संगठनहरूले कथित ‘शैक्षिक हडताल‘ आह्वान गरेको बहानामा निजी विद्यालय सञ्चालकहरूले विद्यालय बन्द गरे । यसरी विद्यालय बन्द गर्दा लाखौं विद्यार्थीहरूको पढाइमा असर पर्छ । तर, विद्यार्थीका नाममा संगठित राजनीतिक दलका भातृ संगठनहरू र स्तरीय शिक्षा प्रदान गर्ने नाममा अभिभावकलाई थलै पार्ने गरेर पैसा असुल्ने सञ्चालकहरूले एक दिन विद्यालय बन्द गर्दा विद्यार्थीको भविष्यमा पर्ने असरलाई उपेक्षा गरे । यसपटक साना पार्टीका भातृ संस्थाले विद्यार्थी जगत्मा आफ्नो राजनीतिक उपस्थिति देखाउन कथित शैक्षिक हडताल आह्वान गरे । ‘लडडु लडाएर झिल्ली झार्ने‘ लोककथाको भ्रष्ट कर्मचारीजस्ता जसरी पनि पैसा कमाउन पल्केका विद्यालय सञ्चालकले पनि मौका छोपे । केही निजी विद्यालय असुरक्षाको कारण देखाएर बन्द गरिए ।
निजी विद्यालयले मनपरी शुल्क लिएको विरोधमा शैक्षिक हडताल आह्वान गरेको साना पार्टीका विद्यार्थी संगठनले प्रचार गरेका छन् । केही पहिले कथित ठूला पार्टीका विद्यार्थी संगठनले पनि यही निहुँमा आन्दोलनको धम्की दिएका थिए । नयाँ सत्रमा विद्यार्थी भर्ना बेलातिर बर्सेनि यस्तै क्रियाकलाप हुनेगरेका छन् । विद्यालय सञ्चालकहरूले शुल्क बढाउँछन्, विद्यार्थी संगठहरूले आन्दोलनको नौटंकी गर्छनु र सरकारले बर्सेनि कुनै न कुनै रूपमा शुल्क नियन्त्रण गर्ने निर्देशन दिन्छ । निजी विद्यालय सञ्चालकले अभिभावकबाट असुल्ने रकममा भाग खोज्ने क्रममा नै विद्यार्थी संगठन र सरकारी कर्मचारीले बर्सेनि कलाविहीन नौटंकी दोहो¥याउने गरेका छन् । सायद, यी बुझेका कारण अभिभावकले यस नौटंकीलाई खासै वास्ता नगरेका हुन् । यसरी सधैँ सहने हो भने यस्तो दोहन नौटंकी बढ्दै जानेछ । यसैले अभिभावकहरूले पनि अब प्रश्न गर्न सुरु गर्नुपर्छ ।
विद्यालय सञ्चालकले विद्यार्थीसँग, खाजा शुल्कलगायतका लागि पैसा लिएका छन् । कतिपय विद्यालयमा त दिनको दुई हजार रुपियाँभन्दा बढी पनि विद्यार्थीबाट असुल गरिन्छ । एक दिन विद्यालय सञ्चालन गर्न नपर्दा ठूला विद्यालयलाई लाखौं रुपियाँ बचत हुन्छ । यसैले कुनै बेनाम संस्थाले आह्वान गर्नेबित्तिकै विद्यालय बन्द गर्न उनीहरू तयार भइहाल्छन् । त्यसरी जोगिएको पैसाको सानो अंश नै सायद विद्यार्थी नेता र सरकारी कर्मचारीको मुख बुझो लगाउन पर्याप्त हुन्छ । बन्द भएको दिनको बस भाडा र खाजा खर्चमात्रै पनि विद्यार्थीसँग लिन नपाइने भए यिनले विद्यालय बन्द गर्ने थिएनन् । बन्दको बहाना सुरक्षालाई बनाए नि खुलेका निजी विद्यालय सञ्चालनमा अवरोध भएको समाचार छैन । यसैले विद्यालय बन्द गर्नुको मूल कारण आर्थिक नै हो भन्ने स्पष्ट हुन्छ । सरकारले पनि विद्यालय बन्द गर्न नपर्ने वातावरण बनाउन सकेको छैन । सुरक्षा प्रबन्धप्रति विद्यालय सञ्चालकलाई विश्वस्त तुल्याएर शैक्षिक तालिकाअनुसारै विद्यालयमा पढाइ र परीक्षा हुने वातावरण सुनिश्चित गर्नुपर्छ । विद्यार्थीको भविष्यसँग कुनै पनि नाम र बहानामा खेलबाड गर्नु जघन्य अपराध हो । यस्ता अपराधीलाई समाजले सरकारले नदिए पनि दण्ड दिनुपर्छ ।
