काठमाडौं । अर्थमन्त्री डा. युवराज खतिवडाले मंगलबार संसदमा बजेट वक्तव्य पढ्दै गर्दा नै ८ प्रतिशत आर्थिक वृद्धिको लक्ष्य पूरा हुने विषयमा टिकाटिप्पणी सुरु भैसकेको थियो । इतिहासमै नदेखिएको उच्च आर्थिक वृद्धिको लक्ष्य कसरी सम्भव होला भन्ने जनमानसमा परिसकेको थियो भने यस विषयमा जानकारहरुले सार्वजनिक अभिव्यक्ति दिन थालिसकेका थिए ।
यसैबीच मंगलबार आयोजित एक कार्यक्रममा पूर्व अर्थमन्त्री डा. रामशरण महतले सरकारले लिएको अधिकांश लक्ष्य विरोधाभाषपूर्ण रहेको टिप्पणी गरे । सार्वजनिक रुपमै उनले भने, “८ प्रतिशत आर्थिक वृद्धिदर असम्भव प्रायः छ । यदी यो लक्ष्य पूरा भए म आफूलाई असफल र खतिवडालाई सबैभन्दा सफल अर्थमन्त्री मान्छु ।” यसका साथै कूल गार्हस्थ्य उत्पादनको ४३ प्रतिशत लगानी गर्नुपर्नेमा उनको जोड छ । स्थानीय र प्रदेश सरकारलाई पनि राजस्व बाँडफाड गर्नुपर्ने हुनाले लक्ष्यको ३० पतिशत राजस्व उठाउन असम्भव रहनेसमेत उनले बताएका थिए ।
महतले दिएको यो अभिव्यक्ति सञ्चारमाध्यममा छाउन थालिसकेको थियो । बुधबार अर्थमन्त्रालयमा आयोजित बजेटसम्बन्धमा पत्रकार सम्मेलनमा पनि यही कुरा गुञ्जियो ।
यसविषयमा पत्रकारको जिज्ञासामा अर्थमन्त्री डा. खतिवडाले भने, “बजेटका लक्ष्य कुनै हालतमा पूरा हुन्छ, शंका नगर्नाेस् ।”
उनले थपे, “हामीले कृषिको क्षेत्रको औसत वृद्धिदर साढे ४ प्रतिशत र औद्योगिक क्षेत्रको वृद्धिदर १२ प्रतिशत हुने अपेक्षा गरेका छौं । सेवा क्षेत्रमा पनि उत्तिकै सुधार हुने भएकाले ८ प्रतिशत आर्थिक वृद्धिदर असम्भव छैन ।”
“पूर्व अर्थमन्त्री डा. महतले ८ प्रतिशत आर्थिक वृद्धिदर हासिल भए आफू असफल भएको घोषणा गर्छ भन्नु भएको रहेछ,” महतको अभिब्यक्तिमाथि व्यंग्य गर्दै उनले भने, “उहाँ मेरो गुरुवर र अग्रज हुनुहुन्छ, उहाँलाई असफल बनाउँन म चाहँन्न । तसर्थ, लक्ष्यअनूरुप आर्थिक वृद्धिदर हासिल भएपनि घटाएरै भएपनि ७.९ प्रतिशत मात्र देखाइदिउँला ।”
अग्रजको सम्मान गर्नु आफ्नो धर्म रहेको उनको आशय थियो । “मैले अग्रजको सम्मान गर्न जानेको छु । ८ प्रतिशत आर्थिक वृद्धि भएको खण्डमा पनि ०.१ प्रतिशत घटाइदिउँला ।”
पछिल्लो समय विद्युत् आपूर्ति सहज हुँदा उद्योगको क्षमताको सतप्रतिशत उत्पादन सम्भव भएको अर्थ मन्त्री खतिवडाको दाबी छ । मेलम्ची र तामोकोशी जलविद्युत् आयोजना पनि अन्तिम चरणमा छ । यी दुई आयोजना सम्पन्न भए यीनको मूल्य अभिवृद्धि पनि औद्योगिक क्षेत्रमै जोडिने खतिवडा दाबी गर्छन् । उनले भने, “सिमेन्ट र खानी उद्योगमा पनि विस्तारै लगानीको प्रतिवद्धता बढ्दै छ । यस्ता उद्योग उत्पादन सुरु गर्ने क्रममा रहेका छन् ।”
सेवा क्षेत्र ८ प्रतिशतले बढ्ने स्वभाविक देखिएको छ भने कृषि र उद्योग क्षेत्रमा आउने वृद्धिले सेवा क्षेत्रमा पनि सकारात्मक प्रभाव पर्ने खतिवडा दाबी गर्छन् । औद्योगिक र सेवा क्षेत्रमा आएको विस्तार तथा सरकारले अगाडि बढाएका रोजगारीसम्बन्धी कार्यक्रमले आगामी आर्थिक वर्षमा थप रोजगारी सिर्जना गर्ने उनको भनाइ थियो ।