बीबीसी । मलेशियाका नयाँ प्रधानमन्त्री महाथिर मोहोम्मदले पूर्वप्रधानमन्त्री नाजिबको कार्यकालमा निर्माण गरिएको फेक न्युज विरुद्धको विवादित कानूनमा आवश्यक परिवर्तन ल्याउने तर पूर्ण रुपमा रद्द नगराउने घोषणा गरेका छन् । सो कानूले संचारको स्वतन्त्रतामाथि नै गम्भीर प्रश्न उठाएको आरोप लगाइएपनि सांसदले निर्वाचनको अघिल्लो हप्ता त्यसलाई पारित गरेको थियो ।

त्यस समय चुनावको प्रचार गरिरहेका महाथिरले भने आफू सत्तामा आउनासाथै उक्त कानूनलाई पूर्ण रुपमा हटाइदिने वचन दिएका थिए । तर अहिले चाहिँ उनले मिडियाको स्वतन्त्रताको पनि एउटा निश्चित सीमा तय गर्न जरुरी रहेको बताएका हुन् । मलेशियामा यसअघि फेक न्युज प्रचार गर्नेमाथि ६ वर्षको जेल सजाय र १ लाख २८ हजार अमेरिकन डलरको जरिवाना तय गरिएको थियो । गत अप्रिलमा निर्वाचन अगाडि नै सो कानून प्रस्ताव गरिएको थियो । त्यतिबेला आफ्ना आलोचकहरुको मुख बन्द गर्न नाजिबले यस्तो षड्यन्त्र रचेर देशमा निरंकुश शाषन भित्र्याउन खोजेको विपक्षीहरुको आरोप थियो । यस कानूनको कारबाहीमा भने अहिलेसम्म डानिस नेस्नलबाट एकजना संचारकर्मी मात्र परेका छन् ।

यसै घटनापछि महाथिरले आफू विजयी भएमा उक्त कानून पूर्ण रुपमा रद्द गराउने र यस्तै प्रकारका अन्य विवादित नियमहरु पनि हटाइदिने वचन दिएका थिए । त्यतिबेला नाजिबको सरकारले महाथिरमाथि समेत फेक न्युज फैलाउँदै हिँडेको आरोप लगाएको थियो । तर प्रधानमन्त्री पदमा आइसकेपछि भने आइतबार उनले भनेका छन्, ‘हामी संचारको स्वतन्त्रताको पक्षमा भएपनि यसको सिमित सिमा तोक्न जरुरी छ । त्यसैकारण हामीले यसलाई पूर्ण रुपमा रद्द गर्दैनौँ तर फेक न्युज नियममा आवश्यक परिवर्तन भने अवश्य ल्याउनेछौँ जसपछि जनता र मिडियाहरुले कुन समाचार फेक हो र कुन सहि हो भन्ने सजिलै थाहा पाउन सक्नेछन् ।’

उता एयर एसियाका प्रमुखले पनि निवार्चनमा पूर्वप्रधानमन्त्री नाजिब रजकको सरकारबारे प्रचार गर्न मद्दत गरेकामा माफी मागेका छन् । चुनावको केही समय अगाडि एयर एसियाका प्रमुख टोनी फर्नान्डसले विमानभित्रै नाजिबको समर्थन भिडियो यात्रुहरुमाझ प्रस्तुत गरेका थिए र साथै उनको सरकारको स्लोगनलाई समेत विमानमा पेन्ट गरेका थिए । यसै कारणले चारैतिरबाट आलोचित हुनुपरेपछि आइतबार आधिकारिक फेसबुक पेजमार्फत एउटा भिडियो सार्वजानिक गर्दै उनले माफी मागेका हुन् । उनले भनेका छन्, ‘मेरो सो निर्णय कुनैपनि अवस्थामा सहि थिएन र मलाई त्यसप्रति सधैँ पछुतो रहिरहनेछ ।’