काठमाडौं । नेपाली चलचित्रकै इतिहासमा सर्वाधिक ग्रस कलेक्सन गरेर नयाँ रेकर्ड बनाएको चलचित्र ‘छक्का पञ्जा’ को तेस्रो सिक्वेलमा नयाँ नायक नायिका देखिने भएका छन् । शुक्रबारबाट छायांकन सुरु भएको ‘छक्का पञ्जा–३’ मा कमेडी कलाकार अघिल्लो सिक्वेलकै दोहोरिए पनि नायक नायिकामा भने नयाँले प्रवेश पाएका हुन् ।
नायिकामा दीपिका प्रसाइँले इन्ट्री मार्दा नायकमा पुष्प खड्काले प्रवेश पाए ।
पुष्प भर्खरै प्रदर्शनमा आएको चलचित्र ‘मंगलम’ का नायक हुन् भने दीपिका केही महिना अगाडि रिलिज भएको चलचित्र ‘ऐश्वर्य’ की नायिका हुन् । दुबै चलचित्रले राम्रै ब्यापार गरेका थिए । चलचित्रको ब्यापारभन्दा पनि उनीहरुको अभिनयको तारिफ बढी भएको थियो । पुष्पको खुलेरै प्रंशसा भएको थियो भने नव नायिकाका रुपमा प्रवेश गरेकी दीपिकाको अभिनय हेरेर सम्भावना बोकेकी नायिका भनिएको थियो ।
‘ऐश्वर्य’ दीपिकाको पहिलो चलचित्र थियो भने पुष्पले भने ‘मंगलम’ भन्दा अगाडि अन्य चलचित्रमा पनि काम गरिसकेका थिए । तर उनले अन्य चलचित्रबाट भने अपेक्षित सफलता पाउन सकेका थिएनन् । ‘दर्पण छायाँ–२’ मा पनि उनले अभिनय गरेका थिए । उनले दर्जनौं म्युजिक भिडियोमा समेत अभिनय गरिसकेका छन् ।
दसैंको फुलपातीका दिन रिलिज गर्ने भनिएको चलचित्र ‘छक्का पञ्जा–३’ लाई दीपाश्री निरौलाले निर्देशन गर्दैछिन् ।