एजेन्सी । अफगानिस्तानको राजधानी काबुलमा भएका विष्फोटमा परेर २९ जनाको मृत्यु भएको छ । विष्फोटमा परेर ४० जना घाइते भएका छन् ।
विष्फोटनमा परेर सात जना पत्रकारको पनि मृत्यु भएको न्यूज एजेन्सी एएनआईलाई उद्धृत गर्दै हिन्दुस्तान डटकमले समाचार प्रकाशित गरेको छ । एएनआईका अनुसार विष्फोटमा परेर न्यूज एजेन्सी एएफपीका एक फोटोग्राफरको पनि मृत्यु भएको छ ।
अफगान प्रहरीले शशदारक क्षेत्रमा विष्फोट भएको पुष्टि गरेको छ । अफगानिस्तानको टोलो न्यूजका अनुसार काबुलको शशदारक क्षेत्रमा भएको विष्फोटमा परेका घाइतेका उद्धार भइरहेको समयमा फेरी विष्फोट भएको थियो ।
१४ अप्रिलदेखि आजसम्म अफगानिस्तानमा छ वटा आक्रमण भइसकेका छन् । एक साता अघि काबुलमा भएको बम विष्फोटमा ६० जनाको मृत्यु भएको थियो ।