काठमाडौं । चीनको ग्वान्जाओमा रहेको नेपाली महावाणिज्यदुतावासले सहरका भित्रि भागमा गुड्ने बसमा नेपालको पर्यटन प्रवर्द्धनका लागि नेपालका पर्यटकीय क्षेत्रको प्रचार प्रसार थालेको छ ।

ग्वान्जाओस्थित नेपाली महावाणिज्यदुत रवी भट्टराईका अनुसार चीनबाट वार्षिक १४ करोड पर्यटक विदेश जाने गरेको पाइए पनि नेपालमा भने १ लाख मात्रै पुग्ने गरेकाले त्यसलाई बढाउने र नेपालको पर्यटन प्रवर्द्धन गर्नका लागि यो पहल थालिएको हो ।

अहिले स्थानीय चारवटा बसमा नेपालका लुम्बिनी, पोखरा, एकसिंगे गैँडा लगायतका तस्बिर राखेर प्रचार प्रसाद सुरु गरिएको उनले जानकारी दिए ।

उनका अनुसार ४ वटा बसमा यसरी प्रचार थालिएको छ । १८ हजार युआन एउटा बसका लागि खर्च गरिएको उनको भनाई थियो ।

“यो सहरबाट मात्रै वार्षिक ५० लाख पर्यटक बाहिर जान्छन्,” उनले भने, “तीमध्ये केही पर्यटकलाई नेपाल लैजान सकियो भने नेपालको पर्यटन प्रवर्द्धनमा टेवा पुग्नेछ ।”
“यहाँ धेरैलाई नेपालकै बारेमा जानकारी छैन, भएकाले पनि गलत रुपमा बुझेको पाइयो, त्यसैले नेपालको पर्यटन प्रवर्द्धन नै मुख्य कुरा हो,” उनले भने ।

उनले कम्तिमा पनि २० लाख चिनियाँले वार्षिक नेपालको भ्रमण गर्नुपर्ने योजना बनाइएको भए पनि विभिन्न समस्याका कारण पूरा हुन नसकेको बताए ।

तस्बिर : भट्टराईको फेसबुकबाट