चितवन । भूकम्प लाभान्वितहरुको बसोवास व्यवस्थापनमा सहयोग गर्न खटिएका इन्जिनियरहरु यतिबेला बेखर्ची बनेका छन् । दुई महिनादेखि तलब नपाएको भन्दै उनीहरुले बेखर्ची भइरहे आफूहरु जागिर छाड्ने बताएका छन् ।

केन्द्रीय कार्यालयबाट तलब निकासा भइसके पनि दुई महिना बित्दासमेत तलब हात नपरेपछि चितवन र नवलपरासीका इन्जिनियरहरुले दुखेसो पोखेका छन् ।

कावासोती क्षेत्रमा खटिएका इन्जिनियर ज्ञानु रिमालले गुनासो गर्दै भने, “घरमा छोरा इन्जिनियर छ, सरकारी जागिर खा’छ भनेर आशा गर्छन्, हामी भने साथीभाइसँग सापटी मागेर खर्च चलाउनुपरेको छ ।”

दुई महिनासम्म तलबविहीन भएर बसेको इन्जिनियर सुवास शर्माले बताए । उनी भन्छन्, “तलब सम्बन्धित कार्यालयमा आएको सूचना पाएका छौँ, हातमा भने परेको छैन ।”

केही इन्जिनियर तलब नपाएको गुनासो लिएर आएको राष्ट्रिय पुननिर्माण प्राधिकरणका चितवन प्रमुख राजेन्द्र कार्कीले बताउँछन् । उनी भन्छन्, “केहीले तलब नपाए जागिर छाड्छौँ भनेका छन् । इन्जिनियरहरुको मानसिकतामा असर पर्दा कामको गतिमा समेत प्रभाव परेको छ ।”

सहरी विकास तथा भवन निर्माण कार्यालय भरतपुरका प्रमुख झपट थापाले बैंक खाता नभएकाको हकमा तलब खुवाउन गाह्रो परेको बताउँछन् ।

प्रमुख थापा भन्छन्, “तलब ढिला गरी निकासा भयो । अन्य क्षेत्रबाट रमाना लिएर आउनेको हकमा आवश्यक कागजात नआइपुग्दा तलब खुवाउन समस्या परेको हो । बैंक खाता खोलेकाहरुको हकमा तलब खुवाउन सकस्या छैन ।”