काठमाडौं । काँडाघारीस्थित अक्षरा स्कुलले ‘अक्षरा शैक्षिक प्रदर्शनी २०७४’ आयोजना गरेको छ । कागेश्वरी मनोहरा नगरपालिकाका प्रमुख कृष्णहरि थापाले प्रदर्शनी उद्घाटन गरे । प्रदर्शनी उद्घाटन ७ कक्षामा अध्यनरत विद्यार्थी केल्भिन संग्रौलाले तयार गरेको ड्रोन उडाएर गरिएको थियो ।
शैक्षिक प्रदर्शनीमा विद्यालयका सबै विद्यार्थी सहभागी भएर विभिन्न शैक्षिक स्टलहरु राखेका थिए । प्रदर्शनीमा विज्ञान, नेपाली, इतिहास, भूगोल, प्रदेश, जलविद्युत्, सडक, कम्प्युटर, मोबाइल र यससँग सम्वन्धित सफ्टवेयरलगायत गरी ६० स्टल समावेश रहेको विद्यालयकी प्रिन्सिपल अञ्जु भट्टराईले बताइन् ।
विद्यार्थीमा अन्तर्नीहित प्रतिभा उजागर गर्ने र कक्षामा सिकेका कुरा व्यवहारमा उतार्न सो प्रदर्शनी आयोजना गरिएको विद्यालय सञ्चालक समितिका अध्यक्ष राधेश्याम खड्काले बताए । प्रदर्शनी हेर्न काँडाघारी र आसपासका विभिन्न २ दर्जन विद्यालयका विद्यार्थीका साथै अभिभावक तथा अन्य अवलोकनकर्ता आएका थिए ।