काठमाडौं । आगामी फागुन १ गते पर्ने यस वर्षको महाशिवरात्रि पर्वका लागि राजधानीको पशुपतिनाथमा तयारी तिव्र पारिएको छ । विगतका वर्षहरुमा जस्तै यस वर्षको महाशिवरात्रि पनि व्यवस्थित रुपमा मनाउन विभिन्न तयारी भइरहेको गुठी संस्थानले जनाएको छ । 

गुठी संस्थान महाशिवरात्रि मूल आयोजक समिति प्रमुख लछुना शर्मा काफ्लेका अनुसार विशेषगरी भारतबाट आउने साधु बाबाहरुका लागि विशेष व्यवस्था गरिनेछ । “विगतका वर्षहरुमा जस्तै यस वर्ष पनि पशुपति गुठी संस्थानले साधुबाबाहरुका लागि विशेष व्यवस्था गर्नेछ,” उनले भनिन् । विभिन्न स्थानबाट आउने नागा बाबाहरुको लागि धुनी बाल्न चाहिने काठ व्यवस्था गरिएको उनले जानकारी दिइन् । 

विशेषगरी तराई क्षेत्रबाट विशेष काठ ल्याइएको गुठी संस्थानका काठ व्यवस्थापक चेतमान गिरिले बताए । वर्षेनी कम्तिमा पनि ४५ हजार किलो काठ शिवरात्रिको लागि  पशुपति क्षेत्रमा भित्रिने गर्दछ । तराईबाट ल्याइएको काठ पशुपति क्षेत्रका ४ वटा अखडाबाट बाँड्ने तयारी छ । शिवरात्रिका लागि धुनी जगाउन ३० हजार किलो काठ पशुपति क्षेत्रमा ल्याइसकिएको छ ।

यस्तै, पशुपतिनाथमा भारतबाट आउने साधुबाबाहरुका लागि विशेष खाना, खाजालगायत भत्ताको पनि व्यवस्था गरेको गुठी संस्थानका प्रमुख काफ्लेले बताइन् । “५ दिनसम्मको खाने बस्ने व्यवस्था गर्नुका साथै नगद खर्च दिने पनि व्यवस्था गरेका छौं । यसका लाििग २५ लाख रुपैयाँ छुट्याइएको छ,” उनले भनिन् । 

उता, पशुपति क्षेत्र विकास कोषले भक्तजनको सुविधाका लागि १० वटा सेवा प्रदायक समिति गठन गरेको छ । स्वास्थ्य, सुरक्षा, जुत्ताचप्पल संरक्षण, चन्दन, टीकाप्रसाद वितरणलगायत कामका लागि समिति गठन गरिएको हो । गत वर्ष कोषले झण्डै ७० लाख रुपैयाँ महाशिवरात्रि पर्व व्यवस्थापनका लागि खर्च गरेको थियो । 

पशुपति क्षेत्रमा महाशिवरात्रि मनाउन भारतका विभिन्न स्थानबाट साधुहरु आउने क्रम सुरु भइसकेको छ । महाशिवरात्रिका लागि यहाँ आइपुगेका साधुले आगो ताप्न र खाना पकाउन दाउरा माग गर्न थालिसकेका छन् । 

– रश्मिता माझी र प्रिज्मा जोगेठ्वा (थारू) 
(प्रशिक्षार्थी)