काठमाडौं । प्रहरी महानिरीक्षक प्रकाश अर्यालले काठमाडौं दरबारमार्गको एक होटलमा भएको सामूहिक बलात्कारको घटना ढाकछोप गर्ने प्रहरी अधिकारीलाई कानुन बमोजिम कारवाही हुने बताएका छन् ।

दरबारमार्गमा नवनिर्मित प्रहरी भवनको उद्घाटन गर्दै महानिरीक्षक अर्यालले युवती बलात्कारका दोषीलाई कानुनी दायरामा ल्याउने र दोषीलाई नै सहयोग गर्ने प्रहरी अधिकारीलाई पनि कानुनअनुसार कारवाही गर्ने बताए ।

“सामूहिक बलात्कारजस्तो जघन्य अपराधलाई ढाकछोप गर्नु सामान्य कुरा हैन, त्यसमा जो प्रहरी कर्मचारी दोषी देखिन्छन्, कारवाही भोग्न तयार भए हुन्छ,” उनले भने ।

गएको माघ ११ गते दरबारमार्गस्थित ल्यान्डमार्क होटलमा एक किशोरीमाथि सामूहिक बलात्कार भएको थियो । घटना लुकाएर मिल्न दबाब दिएको रहस्य खुलेपछि इन्सपेक्टर लक्ष्मणसिङ ठकुरीलाई नियन्त्रणमा लिएर १ नम्बर गणमा राखिएको छ भने वृत्तका प्रमुख डीएसपी तिलक भारतीलाई अनुसन्धानकै लागी जिल्लामा तानिएको छ ।