काठमाडौँ, रासस । प्रधानमन्त्री शेरबहादुर देउवाले नेपाल टेलिभिजनले आफूलाई सन्तुलित र विश्वसनीय सञ्चारमाध्यमका रुपमा स्थापित गर्न सफल भएको बताएका छन् । 
नेपाल टेलिभिजनको ३३औँ वार्षिकोत्सवको अवसरमा आयोजित कार्यक्रममा उनले भने, “संघीय लोकतान्त्रिक गणतन्त्रलाई संस्थागत गर्ने राज्यको अभियानमा एनटिभीले काँधमा काँध मिलाएर हिँडेको छ ।” 

प्रधानमन्त्री देउवाले एनटिभीले आफूलाई समयानुकूल परिमार्जन र परिस्कृत गर्दै देशको जेठो र पाको टेलिभिजनको रुपमा उभ्यान सफल हुनु सबैको लागि गर्वको विषय भएको बताए । 
सूचना तथा सञ्चारमन्त्री मोहनबहादुर बस्नेतले संघीयताको ढाँचाअनुरुप नेपाल टेलिभिजनलाई पनि ढाल्दै जानु आजको आवश्यकता रहको भन्दै त्यसका लागि सरकारका तर्फबाट गर्नुपर्ने सबै सहयोग गर्न तयार रहेको बताए । मन्त्री बस्नेतले नेपालका सबै भूगोल र जनतासम्म नेपाल टेलिभिजनको सेवाको पहुँच पुग्ने गरी कार्ययोजना बनाउन आफूले टेलिभिजनका अध्यक्षलाई निर्देशन दिएको र त्यसका लागि आवश्यक सहयोग गर्न सरकार तयार रहेको बताए । 
नेकपा एमालेका सचिव योगेश भट्टराईले नेपाल टेलिभिजनले जनतालाई सचेत र सुसूचित गर्दै लोकतन्त्र र सामाजिक न्यायका पक्षमा संगठित गर्न खेलेको भूमिका अग्रणी रहेको बताए । 
मुलुकलाई एकताको शुत्रमा सबैलाई बाँध्न र साझा राष्ट्रियताका लागि काम अघि बढाउन नेपाल टेलिभिजनले अझ प्रभावकारी भूमिका खेल्ने विश्वास उनले व्यक्त गरे । नेपाल टेलिभिजनका अध्यक्ष महेशराज दाहालले टेलिभिजनलाई आगामी साउनबाट ‘एचडी’ प्रविधिमा जाने गरी काम अघि बढाएको जानकारी दिए । 
नेपाल टेलिभिजनका महाप्रबन्धक गोविन्द रोक्काले स्याटेलाईटबाट १४८ मुलुकमा नेपाल टेलिभिजन हेर्न सकिने र देशको ७२ प्रतिशत जनतासम्म यसको पहुँच पुगेको जानकारी दिए ।