चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’का सुपुत्र स्वर्गीय प्रकाश दाहालको स्मृतिमा चितवनमा राष्ट्रिय खेलकुद प्रतियोगिता हुने भएको छ ।

यही माघ २८ र २९ गते भरतपुरको गेष्ट हाउस चौरमा दाहालको स्मृतिमा राष्ट्रिय खेलकुद प्रतियोगिता गर्न लागिएको आयोजकले बुधबार भरतपुरमा पत्रकार सम्मेलन गरी जानकारी दिएको छ ।

सो अवसरमा चौथो मुवा थाई प्रतियोगिता तथा बृहत तेक्वान्दो प्रतियोगिता गरिने अल मार्सल आर्ट एकेडेमी चितवनका अध्यक्ष उत्तम गुरुङले जानकारी दिए ।

पूर्वप्रधानमन्त्री एवम् माओवादी केन्द्रका अध्यक्ष प्रचण्डले उद्घाटन गर्ने प्रतियोगितामा देशभरबाट खेलाडीहरु सहभागी हुने गुरुङले बताए । थाईल्याण्डमा प्रख्यात रहेको मार्सल आर्टसम्बन्धी खेल मुवा थाईको तीन वटा संस्करण काठमाडौँ उपत्यकामा भए पनि चौथो चितवनमा गर्न लागिएको हो ।

उक्त प्रतियोगिताले मार्सल आर्ट क्षेत्रमा नयाँ आयामहरु थप्दै नयाँ प्रतिभा प्रस्फुटन गर्न मद्दत पुग्ने गुरुङले बताए । उनले भने, “प्रतियोगितामा देशभरबाट १५० भन्दा बढी खेलाडीको सहभागिता रहन्छ । पुरुषको आठ वटा तौल समूहमा र महिलाको दुई वटा तौल समूहमा प्रतिस्पर्धा गरिने छ ।”

प्रत्येक तौल समूहमा पहिलो हुने खेलाडीलाई १० हजार रुपैयाँको साथमा ट्रफी, मेडल र प्रमाणपत्र प्रदान गरिनेछ । त्यस्तै, दोस्रो हुने खेलाडीलाई ६ हजार रुपैयाँका साथै ट्रफी, मेडल र प्रमाणपत्र तथा तेस्रो हुने खेलाडीहरुलाई चार हजार रुपैयाँको साथमा ट्रफी मेडल र प्रमाणपत्र दिइने आयोजकले जनाएको छ ।

खेलाडीहरुको खाने, बस्ने तथा ट्रयाक र सुटको व्यवस्थासमेत आयोजकले गर्ने गुरुङले जानकारी दिए । रिङमा खेलाइने मुवा थाईको आयोजना अल मार्सल आर्ट एकेडेमी चितवन र नेपाल मुवा थाई संघले संयुक्त रुपमा गरेका हुन् ।