काठमाडौं । कुवेतस्थित नेपाली दुतावासले सन् २०१७ भरीमा कुवेतमा विभिन्न खाले समस्यामा परेका नेपालीलाई दुतावासमार्फत गरको सहगोग तथा उद्धारको प्रगति विवरण सार्वजनिक गरेको छ । एक प्रेस वक्तब्यमा दुतावासले भनेको छ, “विभिन्न प्रकारका समस्या एवं संकटमा परेका नेपाली घरेलु महिला कामदारहरुको समस्या समाधान, खानेबस्ने व्यवस्था, उद्धार एवं नेपाल फिर्ता पठाउने कार्य निरन्तर रुपमा गरी २४९ घरेलु कामदारलाई नेपाल फिर्ता पठाउन सफल भएका छौं ।”
त्यसबाहेक कम्पनीक्षेत्रमा अप्ठेरोमा परेका १५५ जना नेपाली कामदारको पनि उद्धार गरी घर फर्काईएको जनाएको छ । त्यस्तै बिरामी अवस्थामा रहेका १७ जना नेपालीलाई उपचार पश्चात नेपाल फिर्ता पठाईएको विज्ञप्तिमा उल्लेख छ ।
त्यस्तै गरी २०१७ मा कुवेत सरकारबाट नेपाल फिर्ता पठाउने अबस्थामा रहेका वा गैरकानुनी रुपमा कुवेतमा बस्दै आएका १८४० नेपालीलाई नेपाल फर्कन सहज बनाईदिन यात्रा अनुमतिपत्र तथा आबश्यक कागजपत्र मिलाईदिएको दुतावासले जनाएको छ ।
त्यस्तै २०१७ मै कुवेतमा १५ जना पुरुष र १६ जना महिला गरी जम्मा ३१ जना नेपाली कामदारको मृत्यु भएकोे विज्ञप्तिमा जनाईएको छ ।
२०१७ मा मृतकको शव नेपाल पठाईएको तथा ती मृतकका परिवारलाई क्षतिपूर्ति बापतको पाँच करोड २६ लाख ४३ हजार रुपैयाँ पठाईएको समेत जनाईएको छ ।
त्यस्तैगरी कुवेती कारागारमा बन्दी जिवन बिताईरहेका ७० जान नेपालीमध्ये राजदुतको पहलमा १८ जनालाई माफि दिलाइएको र त्यसमध्ये ६ जना नेपाल फर्किसकेको समेत जानकारी दिइएको छ ।