काठमाडौं । नुवाकोटका जनप्रतिनिधि (वडाध्यक्ष) सुनबहादुर तामाङलाई पक्राउ गर्नुको कारण पेश गर्न सर्वोच्च अदालतले नेपाल प्रहरीको केन्द्रीय अनुसन्धान ब्युरोलाई आदेश दिएको छ । बन्दी प्रत्यक्षीकरण रिटमा सुनुवाइ गर्दै न्यायाधीश तेजबहादुर केसीको एकल इजलासले सो आदेश जारी गरेको हो । सर्वोच्चले तामाङलाई पक्राउ गर्नुको कारणबारे लिखित जवाफ पेश गर्न सीआईबीलाई आदेश दिएको छ । साथै अदालतले बन्दीलाई तीन दिनभित्र अदालतमा उपस्थित गराउन पनि भनेको छ ।
चेलिबेटी बेचबिखन आरोपमा वडाध्यक्ष तामाङ केही समयअघि पक्राउ परेका थिए । प्रहरीको अनुसन्धानमा सुनबहादुरले गाउँका २ सयभन्दा धेरै चेलीलाई बम्बई तथा दिल्लीका वेश्यालयहरुमा लगेर बिक्री गरेको खुलेको थिया । एक महिलासँग मिलेर उनी आफैंले दिल्ली र मुम्बईमा वेश्यालय पनि चलाउँदै आएको प्रहरीको प्रारम्भिक अनुसन्धानमा देखिएको छ ।
पक्राउ परेका तामाङलाई माघ ७ गते अदालतले धरौटीमा छाड्ने आदेश दिएको थियो । उनी ५ लाख रुपैयाँ धरौटीमा रिहा भएका थिए । लगत्तै सीआईबीले अर्को मुद्दामा अनुसन्धान गर्नुपर्ने भन्दै उनलाई पक्राउ गरेको थियो ।