काठमाडौं । अष्ट्रेलियाको सिड्नीमा एक नेपालीले बेलायती प्रेमिकाको हत्या गरेपछि आफ्नो समेत ज्यान लिएको डेलीमेलले बताएको छ । शेफका रुपमा काम गरिरहेका ब्राजिल गुरुङका आफन्तलाई उनकी पूर्वप्रेमिकाले चिन्ताजनक म्यासेज पठाएको केही दिनमै उनको शव फेला परेको बताइएको छ । 

३३ वर्षीय ब्राजिल गुरुङले आत्महत्या गर्नुअघि तीन महिनादेखि सँगै बस्दै आएकी आफ्नी प्रेमिका एमिलिया ब्लेकको अपार्टमेन्टभित्रै हत्या गरेको अष्ट्रेलियन सञ्चार माध्यमले बताएका हुन् । उनको टाउकोमा थुप्रै गम्भीर चोटहरु फेला परेको बताइएको छ । उनका आफन्तलाई खबर गर्ने पूर्वीप्रेमिकासँग उनी गतवर्ष केही महिनाका लागि सँगै बसेको खुलासा भएको छ । गत बिहीबार ब्राजिल र ब्लेकको शव भेटिनुअघि तिनले ब्राजिलका आफन्तलाई म्यासेज गर्दै ब्राजिल भयानक अवस्थामा रहेको बताएकी थिइन् ।

त्यसको भोलिपल्ट नै उनीहरुका घरमालिकले शव फेला पारी पुलिसलाई खबर गरेको बताइएको छ । ब्राजिलकी श्रीमतीसँग भने उनको १६ महिना अघि मात्रै बिछोड भएको बताइएको छ । थप अनुसन्धानका क्रममा ब्राजिलको मानसिक स्वास्थ्य नेपालमै रहँदादेखि ठीक नभएको र उनले उच्च मात्रामा लागू पदार्थ सेवन गर्ने गरेको पत्ता लागेको बताइएको छ ।

मागी विवाह गरेर पढ्नका लागि पत्नीसँग अष्ट्रेलिया पुगेका ब्राजिलले पढाइ जारी राख्न सकिरहेका थिएनन् भने अर्कोतर्फ परिवारको ऋण पनि दिनदिनै थपिँदै गइरहेको थियो । त्यसकारण आफ्नो तनावलाई कम गर्न उनले नियमित ड्रग्स लिने गरेको स्रोतले बताएको  छ । त्यसपछि रेस्टुरेन्टमा काम गर्दैगर्दा उनको पहिलोपटक ब्लेकसँग भेट भएको थियो । त्यस समय उनीहरुको सम्बन्ध राम्रो चलिरहेको थियो तर बिस्तारै ब्राजिलले ड्रग्सको लत छोड्न नसक्दा चिनेका सबै साथीहरुसँग पैसा माग्न थालेपछि सबैले उनीमाथि शंका गरेका थिए । 

उनीसँगै कामगर्नेले  बताएअनुसार ब्राजिल आर्थिक समस्याका कारण तनावको शिकार भएका थिए र उनी ड्रग्सतिर लागेको उनलाई पहिलै शंका लागेको थियो ।

अनुसन्धानका अनुसार ब्लेकले अष्ट्रेलिया छोड्ने तयारी गरिरहेकी थिइन् जसकारण उच्च डोजमा कोकिन लिने गरेका ब्राजिलले उनलाई रोक्न त्यस्तो हर्कत गरेको पुलिसले अनुमान गरेका छन् । तर यस घटना सम्बन्धी पुलिसले अझै अनुसन्धान गरिरहेको बताएको छ । उता २२ वर्षीया एमिलियाका परिवारले भने यस घटनाप्रति विश्वास नै गर्न नसकेको बताइएको छ ।