कैलाली । धनगढीलाई प्रदेशको अस्थाई राजधानी तोकिएसँगै प्रदेश प्रमुखको कार्यालय र निवासका लागि भवनको खोजी तीव्र पारिएको छ ।
क्षेत्रीय प्रशासक लक्ष्मीराम पौडल, उपप्रशासक शंकरबहादुर विष्टको टोली प्रदेश प्रमुखको कार्यालय र निवासको टुंगो लगाउन धनगढी आएका हुन् ।
उनीसँगै जिल्ला प्रशासनका प्रतिनिधि, शहरी विकास तथा भवन डिभिजन कार्यालयका प्रमुख रवीन्द्र बोहरासहितको टोलीले धनगढीका अधिकांश सरकारी कार्यालय र त्यहाँ रहेका आवासीय भवनहरूको निरीक्षण गरेको छ ।
जिल्ला प्रशासन, क्षेत्रीय स्वास्थ्य तालिम केन्द्र, क्षेत्रीय बन निर्देशनालय, जिल्ला कृषि विकास कार्यालय, क्षेत्रीय सिञ्चाइ निर्देशनालय, जिल्ला समन्वय समितिको कार्यालय, घरेलु तथा साना उद्योग कार्यालयसहितका दुई दर्जन बढी कार्यालयको निरिक्षण गरिएको बताइएको छ । टोलीले क्षेत्रीय सिंचाइ निर्देशनालय, क्षेत्रीय वन निर्देशनालय बढी उपयुक्त भएको निष्कर्ष निकालेको बुझिएको छ ।