भक्तपुर (रासस)। महानगरीय प्रहरी परिसर भक्तपुरले माटो व्यवसायीको हत्यामा संलग्न रहेको आरोपमा पक्राउ परेका दुईजनालाई आज सार्वजनिक गरेको छ ।
सार्वजनिक हुनेमा हत्यामा संलग्न रहेको अभियोगमा पक्राउ परेका ओखलढुङ्गा घर भएकी रीता राई र हत्याका प्रत्यक्षदर्शी काभ्रे देउपुर मण्डन घरभई ब्रम्हायणी मन्दिरमा विगत आठ वर्षदेखि बस्दै आएका ७० वर्षीय रामबाबु लामा रहेका छन् । माटो व्यावसायी चाँगुनारायण नगरपालिका–९ ताथलीका सिताराम सैंजुको भक्तपुर नगरपालिका–९ ब्रम्हायणीमा बुधबार बिहान घोप्टो परेको अवस्थामा शव भेटिएको थियो ।
प्रहरी परिसर भक्तपुरका प्रवक्ता प्रहरी नायब उपरीक्षक कृष्ण प्रसाईका अनुसार ताथलीको माटो खानी सञ्चालक सैजु मंगलबार राति १०:३० बजे ब्रम्हायणी मन्दिरमा गएका थिए ।
जात्रा हेर्न गएका सैजू मन्दिर पुगेपछि लामासँग बसेर कुरा गर्दै गर्दा राई पनि राति करिब ११ बजे आइपुगिन् । मदिरा पिएका तीनजना सँगै बसेर कुरा गर्दै गर्दा सैंजूले राईलाई जिस्क्याउँदै जवर्जस्ती गर्न खोजे । राईले रिसाउँदै इँटाले सैँजुको टाउँकोमा हान्दा ढलेको र उनलाई छाडेर राई हिडेपछि लामाले सैजुलाई पानी खुवाएर आफू पनि सुते ।
बिहान ५ बजे मात्रै सैजू मृत भेटिए । मदिराले मातिएका तीनजनाले ख्याल ख्याल गरेकै भरमा ज्यान गएको छ । घाईते भए लगत्तै अस्पताल लैजान सकेको भए सैजूको ज्यान बाच्न सक्ने प्रहरीको निष्कर्ष छ ।
