काठमाडौं । गएको भदौ १४ गते नेपाल प्रहरीको केन्द्रीय अनुसन्धान ब्युरोले काठमाडौंबाट १४ किलो सुन बरामद गर्यो । रसुवाको केरुङ नाका हुँदै सुन तस्करी गरी भारतसम्म पुर्याउन लागिएको सूचनाका आधारमा टोखा नगरपालिका–११ सामाखुशीबाट सुन बरामद भएको थियो । 

भदौ १९ गते प्रहरीले काठमाडौंको क्षेत्रपाटीबाट ८८ किलो अवैध सुन बरामद गर्यो । रसुवाको केरुङ नाकाबाट भन्सार छली गरेर यति ठूलो परिमाणमा सुन बरामद भएको यो पहिलो घटना पनि हो । महानगरीय अपराध महाशाखाको टोलीले बा १७ च ६४२७ नम्बरको गाडीबाट सुन बरामद गरेको थियो । उक्त सुन काठमाडौं ल्याउने चिनियाँ दम्पति भने अझै फरार छन् । 

गएको मंसिर २ गते प्रहरीले रसुवागढी नाकाबाट १७ किलो अवैध भन्सार छलीको सुन बरामद गर्यो । जिल्ला प्रहरी कार्यालयबाट खटिएको प्रहरी प्रमुखसहितको टोलीले बोलेरो जिपबाट उक्त परिमाणको सुन बरामद गरेको हो । रसुवागढी नाकाबाट बा ११ च ७९१८ नम्बरको बोलेरो जिपबाट अवैध सुन आउँदै गरेको सूचना पाएको प्रहरीले उक्त सुन बरामद गरेको हो ।  पक्राउ परेका भरिया र जिप  पहिलेदेखि नै सुन ओसार्ने काममा संलग्न भएको तथ्य खुल्यो । 

०७३ चैत ३ गते चीनको केरुङ नाका हुँदै नेपाल भित्रिएको ७ किलो भन्सार छलीको अवैध सुन बरामद भयो । स्याङ्जा वालिङ–९ का प्रकाश गैरेले गाडीको फिल्टरमा फल्स बटम बनाएर लुकाई ल्याएको अवस्थामा रसुवाको टिमुरेबाट प्रहरीले उक्त सुन बरामद गरेको थियो । 

प्रहरीका अनुसार सिन्धुपाल्चोकको तातोपानी नाका बन्द भएपछि तस्करहरु रसुवातिर लागेका छन् । पछिल्लो तथ्यांकले पनि यो कुराको पुष्टि गर्छ । बेला बेलामा सुन बरामद भए पनि वास्तविक कारोबारी पक्राउ पर्दैनन्, भरियामात्रै समातिन्छन् । नेपाल प्रहरीको तथ्यांकअनुुसार चालु आर्थिक वर्षको असोज मसान्तसम्म मात्र देशभरबाट १ सय ३३ किलो अवैध सुन बरामद भएको छ ।

आर्थिक वर्ष २०७१–०२ मा देशभरबाट १ सय ११ केजी सुन प्रहरीले बरामद गरेको थियो । त्यस्तै २०७२–०७३ मा ६८ केजीमा सुन बरामद भएको थियो । अवैध रुपमा भित्र्याएको सुनबाट राम्रो आम्दानी हुने भएका कारण तस्करीको सुन धेरै खपत हुने प्रहरी प्रवक्ता डीआईजी मनोज न्यौपाने बताउँछन् । 

यो पनि 
काठमाडौंमा दैनिक सय किलो अवैध सुन भित्रिन्छ ! कहाँ जान्छ यतिधेरै सुन ?