काठमाडाैं ।

कुनैबेला केवल भरियाका रुपमा प्रयोग हुने नेपाली साना अपराधी अहिले विश्वस्तरका लागू पदार्थका डन भएको नेपाल प्रहरीले पत्ता लगाएको छ । 

हालै अष्ट्रेलियामा पक्राउ परेका छ जना र नेपालमा पक्राउ परेका चार जना तस्करले उपलब्ध गराएको सूचना र प्रहरीको अनुसन्धानका आधारमा धादिङ सत्यदेवीका धर्म पाख्रीन अहिले थाईल्याण्डमा बसेर अन्तर्राष्ट्रिय लागू पदार्थ कारोबारको ठूलो जालो चलाईरहेको नेपाल प्रहरीले जानकारी दिएको छ ।

“धर्म अन्तर्राष्ट्रिय लागू पदार्थ तस्करीका ठूला बादशाह हुन । हामीसँग भएको सूचना अनुसार उनी थाइल्याण्डमा बसेर विश्वभरी लागू पदार्थ तस्करी गर्छन । अब उनको सो संजाल तोड्ने काममा नेपाल प्रहरीले थाइल्याण्डको प्रहरीसँग सहकार्य शुरु गरिसकेको छ,” लागू पदार्थ नियन्त्रण ब्यूरोका डीआईजी जयबहादुर चन्दले भने । 

सन् १९९९ मा काम गर्ने हेतुले थाइल्याण्ड प्रवेश गरेका धर्म पाख्रीन कामको खोजीमा भौतारिँदा भौतारिँदै लागू पदार्थ ओसार पसारको व्यापारमा होमिन पुगे । त्यो खतरनाक व्यापारमा थोरै समयमै उनले ठूलो पैसा कमाए । विस्तारै भरिया बन्न छाडेर आफंै तस्कर बने । थाइल्याण्डमा आफ्नो कारोबार बढाउन अरुको विश्वास नहुने देखेर उनले तस्करीको काम गर्न नेपालकै आफ्ना नातेदारलाई बोलाएर काममा लगाए । पहिले परिवारका सदस्य, अनि बिस्तारै नातेदारलाई पनि बोलाएर काम दिनथाले । 

नेपाल प्रहरीको लागुपदार्थ ब्युरोका अनुसन्धान अधिकृतकाअनुसार धर्म पहिला एक सामान्य परिवारमा जन्मेका उनी अर्बांैको लागुपदार्थ कारोबार गर्छन् ।

धर्मले पहिले दाजु पूर्णलाई व्यापारमा संलग्न गरे । सुरुमा पूर्णले आर्थिक कारोबार हेर्ने र धर्मले तस्करीको व्यवस्थापन । विस्तारै पूर्ण आफै अम्मली भए । त्यत्रो कारोबार चलाएको थाहा नपाएको थाई प्रहरीले उनी अम्मली भएको भने थाहा पाएर पाँच वर्षअघि नेपाल ‘डिपोर्ट’ गरिदियो । 

डीआईजी चन्दका अनुसार पूर्णले नेपाल आएपछि आफ्ना नातेदार र साथीलाई यो धन्दामा फसाउन थाले । आफ्ना नजिकका मान्छेलाई भरिया बनाएर विभिन्न देशमा पठाउन थाले । 

नेपालका भरियालाई प्रयोग गरेर उता भाइ धर्म भने लागुपदार्थ दुनियाभरी पठाउने पापको काममा लिप्त भए । नेपालको चरेस विश्व बजारमा पठाउने, मान्छेलाई हिंसात्मक बनाउने लागुपदार्थ एम्फेटामाइन पनि बर्मा तथा अन्य देशबाट ल्याएर विश्वभर फैलाउने काम बढाउन थाले । 

नेपाल प्रहरीका अनुसार जति पनि लागुपदार्थ नेपाल र भारतको विमानस्थल हुँदै बाहिर जान्छ त्यसमा धर्मको समूहको कुनै न कुनै संलग्नता हुन्छ । 

को–को छन् धर्मको ग्रुपमा ?

थाइल्यान्डबाट लागुपदार्थको तस्करी गर्ने धर्मले दाजु पूर्ण पाख्रिन, थाइल्याण्डमा बस्ने आफ्नी छोरी, नेपालमा बस्ने बहिनी ज्वाई र नातागोताको सहयोगमा तस्करी गर्दै आएको ब्युरोको अनुसन्धानबाट खुलेको छ । 

उनीहरुको समूहमा संलग्न धादिङसत्यदेवी ८ का नेत्र गुरुङ्ग, चित्र तामाङ्ग, बारा डुमरवना ७ का साइमान तामाङ, नुवाकोट बुमङताङका ४ का धनबहादुर तामाङ, थाइल्यान्डबाट पक्राउ परेका बुद्धिबहादुर तामाङ छन् । त्यस्तै अष्ट्रेलियाबाट पक्राउ परेका मनिष श्रेष्ठ, बिक्रम लामिछाने, सीता भण्डारी, दिनेश कठायत, अनिल सिम्खडा, र रिता पन्त पक्राउ पनि समूहसँग सम्बद्ध देखिएका छन् । 

कस्को जिम्मेवारी के ? 

ब्यूरोका अनुसार पूर्ण पाख्रिनको काम धादिङ र मकवानपुरमा बसी नयाँ सदस्य बनाउने, चरेशको खेती र ब्यवस्थापन गर्ने हो । त्यस्तै नेत्र गुरुङको काम थाइल्यान्डबाट फिलिपिन्स, म्यान्मार हुंदै फिलिपिन्स, इन्डोनेसिया, अष्ट्रेलिया  लगायतका मुलुकहरूमा अवैध लागुऔषध एम्फेटामाइन तस्करी गर्ने हो । 

त्यस्तै साइमान तामाङ, र धनबहादुर तामाङको काम नेपालबाट चरेश भारत हँुदै थाइल्यान्ड पु¥याउने र थाइल्यान्डबाट फर्कदा एम्फेटामाइन बोकेर नेपाल हुँदै फेरी युरोप लैजाने हो । ब्यूरोका अनुसार साईमनले १९ पटक भारत, थाईल्याण्ड र हल्याण्डसम्म चरेस पु¥याएका थिए । 

त्यस्तै गएको बिहीबार थाइल्यान्डबाट पक्राउ परेका बुद्धिबहादुर तामाङको काम नेपालबाट थाईल्याण्ड पुगेको चरेश र बर्माबाट थाइल्यान्ड पुगेको लागुऔषध स्टोर गरी राख्ने काम हो । 

गएको बिहीबार धर्मका २ जना बर्मेली भरीयालाई पनि थाई प्रहरीले एम्फेटामाइन सहित पक्राउ गरेको थियो । 

अष्ट्रेलियामा पक्राउ परेका ६ जनाको काम चीनको ग्वांन्जाऊबाट अष्ट्रेलिया पुगेको एम्फेटामाइनको ब्यवस्थापन र विक्रि वितरण गर्ने हो । 

ब्यूरोका डिएसपी अपिल बाहोराले बाह्रखरीसँग कुरा गर्दै भने, “धर्म र उनका दाई पूर्ण पाख्रीनको नेपालमा भएको जालो तोडिएको छ, अब थाइल्यान्डको पालो आएको छ, त्यो पनि छिट्टै हुन्छ ।”