काठमाडौं । आइतबार सिरहामा ड्युटीमा रहेका रहेका प्रहरीमाथि गोली प्रहार गर्ने तीनजनालाई प्रहरीले पक्राउ गरेको छ । 

पक्राउ पर्नेमा शिव रोय, मनोज रोय र सुरेन्द्र रोय रहेका छन् । उनीहरुले चलाएको गोली लागेर प्रहरी जवान मागेराम यादव र म्यादी प्रहरी आदर्श यादव गम्भीर घाइते भएका थिए । घाइते दुवैलाई काठमाडौं ल्याएर प्रहरी अस्पतालमा उपचार भइरहेको र उनीहरुको अवस्था सामान्य हुँदै गएको प्रहरीले जनाएको छ । 

सोमबार बिहान घाइते प्रहरीको अवस्था बुझ्न प्रहरी महानिरीक्षक प्रकाश अर्याल प्रहरी अस्पताल पुगेका थिए । नियमित चेकिङमा रहेका प्रहरीमाथि गोली प्रहार गरी भाग्दै गरेका तीनैजनालाई प्रहरीले आइतबार राति नै पक्राउ गरेको हो । उनीहरुलाई प्रहरीले हिरासतमा राखी अनुसन्धान अघि बढाएको छ । 

मोटरसाइकलमा पेस्तोल बोकेको अवस्थामा सडकमा चेकजाँच देखेपछि शिव र मनोजले प्रहरीमाथि गोली प्रहार गरेका थिए । उनीहरुको गोलीबाट प्रहरी ढलेपछि आफूले प्रयोग गरेको मोटरसाइकल त्यही छाडी अर्को मोटरसाइकल मगाएर फरार भएका थिए । मोटरसाइकल ल्याएर भगाउने सुरेन्द्र राय पनि पक्राउ परेका छन् । 

कुनै आपराधिक घटना गराउने उद्देश्यले पेस्तोल बोकेर हिँडेको र प्रहरी देखेपछि पक्राउ पर्ने डरले प्रहरीकै हत्या गरी भाग्न खोजेको प्रहरी अनुसन्धानबाट खुलेको छ । प्रहरीले घटनालाई भूमिगत समूह र जेलमा रहेका पूर्वसांसद सञ्जय साहसँग जोडेर अनुसन्धान अघि बढाएको छ । 

केही दिन अघिमात्र सञ्जयलाई काठमाडौंबाट सिरहाको जेल सरुवा गराएर लगिएको छ । घटनामा प्रयोग भएको पेस्तोल अत्याधुनिक भएको र द्वन्द्वकालमा प्रहरीबाट लुटिएको हुनसक्ने प्रहरीले आशंका गरेको छ । 

पक्राउ परेका तीनैजनाले आफूहरुले सिरहामा रहेको कुनै बैंक लुट्ने योजनाका साथ हतियारको व्यवस्था गरेको प्रहरीमा बयान दिएका छन् । उनीहरुले त्यो हतियार एक पूर्व माओवादीसँग किनेको समेत बयान दिएको प्रहरी स्रोतले जानकारी दियो ।