काठमाडौं । आशन्न प्रतिनिधिसभा तथा प्रदेशसभा निर्वाचनमा सुरक्षाको तेस्रो घेरामा रही आवश्यक सुरक्षासँगै मतपत्र छपाइ सुरक्षा, निर्वाचन सामग्री ढुवानी, कारागार तथा विमानस्थल सुरक्षालगायतमा सक्रिय रहने नेपाली सेनाले जनाएको छ । 

सेनाका अनुसार पहिलो तथा दोस्रो चरणको निर्वाचनको लागि आवश्यक मतपत्र छपाइमा सुरक्षा प्रदान गर्ने जिम्मेवारी सेनाले पाएको छ । निर्वाचनका लागि ६४ हजार २० जना सुरक्षाकर्मी खटिएका छन् । सेनाले पहिलो चरणको निर्वाचनको लागि मतपत्र ढुवानी सकिएको र दोस्रो चरणमा निर्वाचन हुने ४५ मध्ये अधिकांश जिल्लामा मतपत्र ढुवानी सकिएको सेनाले विज्ञप्तिमार्फत जनाएको छ ।

त्यस्तै, नेपाली सेनालाई कारागार तथा विमानस्थलको सुरक्षाको जिम्मेवारी दिइएको छ ।  देशभरका ५३ वटा कारागार र २३ वटा विमानस्थलको सुरक्षामा सेना खटिएको छ ।

३३ शंकास्पद  वस्तु निस्क्रिय
सेनाले हालसम्म देशका विभिन्न ३३ स्थानमा भेटिएको शंकास्पद वस्तु तथा बम निस्क्रिय पारेका छ । पाँचथरको फिदिम, फाकफोकथुम र हिलिहाङ्ग, जाजरकोट जिल्लाको चौरजहारी, सिन्धुपाल्चोक जिल्लाको मेलम्ची र बाह्रविसे, रोल्पा जिल्लाको भदौरे, रामेछाप जिल्लाको खाडाँदेवी, ओखलढुङ्गा जिल्लाको मोलुङ, लमजुङ्ग जिल्लाको वेसिशहरमा भेटिएका शंकास्पद बस्तु निस्क्रिय पारेको सेनाले जनाएको छ ।

त्यसैगरी पर्वत जिल्लाको कुश्मा, धादिङ्ग जिल्लाको निलकण्ठ, गजुरी, गल्छी र घाटबेशी, बाग्लुङ्ग जिल्लाको बढीगाउँ र निशिखोला, अछाम जिल्लाको साँफेबगर, संखुवासभा जिल्लाको धर्मदेवी, रुपन्देही जिल्लाको बुटवल, रौतहट जिल्लाको गुजरा र कटानी, रसुवा जिल्लाको उत्तरगया, चितवन जिल्लाको भरतपुर, खोटाङ्ग जिल्लाको हलेसी, गोर्खा जिल्लाको गण्डकी र सिरानुचोक, नुवाकोट जिल्लाको शिवपुरी र विदुर, दाङ्ग जिल्लाको शान्तिनगर, कालिकोट जिल्लाको छाती, नवलपरासी जिल्लाको देवचुली एवं दोलखा जिल्लाको भिमेश्वर नगरपालिका गरी जम्मा ३३ स्थानहरुमा फेला परेका शंकास्पद वस्तु, बम तथा आई.ई.डी.हरु सुरक्षितसाथ डिस्पोज गरेको छ ।