काठमाडौं । नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहालले छोरा स्वर्गीय प्रकाश दाहालकै कारण आफ्नो प्रधानमन्त्रीको दोस्रो कार्यकाल सफल भएको बताएका छन् ।
‘सानैदेखि उनी मेरा छोराभन्दा पनि बढी सहकर्मी र सहयोद्धा भए । म इमान्दारीपूर्वक भन्छु, प्रधानमन्त्रीका रुपमा मेरो दोस्रो कार्यकाल उनको सहयोगबिना सफल हुने थिएन,” प्रकाशको सम्झनामा दाहाल निवासमा बिहीबार आयोजित श्रद्धाञ्जली सभामा बाचन गरिएको कृतज्ञता मन्तव्यमा भनिएको छ ।
एक माओवादी नेताले बाचन गरेको मन्तव्यमा प्रचण्डले प्रकाशलाई यसरी सम्झेका छन्–
‘म पूर्णकालीन राजनीतिमा लागेको तीन वर्षपछि २०३८ सालमा प्रकाशको जन्म भयो । म भूमिगत राजनीतिमा थिएँ, कहिलेकाहीँ मात्र घर आउँथें । त्यो पनि राति अबेला आउँथें र बिहान झिसमिसेमै हिँडिहाल्थें । उनी निरन्तर सामाजिक, आर्थिक र मनोवैज्ञानिक असुरक्षाको बीचमा हुर्किए । स्कुल फेर्दाफेर्दै पढाइ लथालिंग भयो । कलिलै उमेरमा हतियार बोकेर क्रान्ति र नेतृत्वको रक्षाका लागि पूर्णकालीन कार्यकर्ता भए । उनी आफ्नो जीवनमा कहिल्यै किशोर हुन पाएनन् । बालकबाट सिधै युवा भए । सक्रिय राजनीतिक जीवनका कारण मैले बाबुका रुपमा उनीमाथि न्याय गरिन, गर्न सकिन ।’
केहीले प्रकाशलाई आफ्नो छोरामात्र ठानेर त्यसैमा उनको व्यक्तित्व सीमित गर्न खोजेको भन्दै प्रचण्डले उनी प्रविधिमा, संगठनमा र व्यवस्थापनमा अत्यन्त पोख्त रहेको बताए ।
योग्यता र क्षमताकै कारण उनी आफ्नो स्वकीय सचिव भएको प्रचण्डले प्रष्टीकरण पनि दिएका छन् ।
पुत्रवियोग सबैभन्दा ठूलो शोक रहेछ भनेर आफूले अनुभूत गरेको भन्दै प्रचण्डले शोकको घडीमा पाएको समवेदना र सान्त्वनाप्रति सबैलाई आभार व्यक्त गरेका छन् ।
श्रद्धाञ्जली कार्यक्रममा उपराष्ट्रपति नन्दबहादुर पुन, एमाले नेता माधवकुमार नेपाल, नेता मोहनविक्रम सिंह, विभिन्न देशका राजदूत, कूटनीतिक नियोगका प्रतिनिधि आदि सहभागी थिए ।