काठमाडौं । अघिल्लो वर्ष चलचित्र ‘छक्का पञ्जा’ पाइरेसी भयो । यो पाइरेसीले विवाद मात्रै झिकेन एक जनाको ज्यानै लियो । त्यसअघि चलचित्र ‘पशुपति प्रसाद’ पनि लिक भयो । हलमा चलिरहेका बेला नै ‘पशुपति प्रसाद’ पाइरेसी भएपछि त्यसको प्रत्यक्ष असर निर्मातालाई पर्यो ।
त्यही घटना ‘लुट–२’ मा आएर पनि दोहोरियो । गत वर्ष प्रदर्शनमा आएको चलचित्र ‘लुट–२’ पनि पाइरेसीको सिकार भयो । चलचित्र मङ्गलवार लिक भएको हो । सामाजिक सञ्जाल फेसबुकमा ‘वाच भिडियो अनलाइन’ नामक पेजमा चलचित्र अपलोड गरिएको छ । जसमा पार्ट १ र पार्ट २ गरी अपलोड गरिएको छ ।
अन्तर्राष्ट्रिय राइटस् लिएको ‘हाइलाइट्स नेपाल’को वाटरमार्क सहित चलचित्र अपलोड गरिएको छ । निश्चल बस्नेतले निर्देशन गरेको चलचित्रले राम्रो समीक्षा बटुल्न नसकेपनि ब्यापारिक सफलता भने पाएको थियो ।