काठमाडौं । हत्या अभियोगमा फरार रहेका बालकृष्ण ढुंगेललाई प्रहरीले गिरफ्तार गरेपछि माओवादी केन्द्रका नेताहरुले सरकारले द्वन्द्वकालिन घटनालाई ब्युँताएर आफूहरुलाई जिस्काउन लागेको बताएका छन् ।
माओवादी केन्द्रका नेतासमेत रहेका ढुंगेल मंगलबार सातदोबाटोबाट पक्राउ परेका हुन् ।
पक्राउपछि माओवादी केन्द्रका केही नेताहरुले बाह्रखरीसँगको कुराकानीमा आफूहरुलाई जिस्काउन ढुंगेललाई पक्राउ गरिएको प्रतिक्रिया दिए ।
“शान्ति प्रक्रियामा आइसकेपछि ढुंगेललाई प्रकाउ गर्न मिल्दैन,” माओवादी केन्द्रका नेता देवेन्द्र पौडेलले भने, “मेलमिलाप गरेर अगाडि बढ्ने भनेको प्रसंगमा पुराना घाउहरु कोट्टयाउन थालियो भने शान्ति प्रक्रिया बिच्किन सक्छ । सरकारले माओवादीलाई जिस्काउने काम गरेको छ, यसले शान्ति प्रक्रियालाई खलल पुर्याउँछ । जनयुद्ध तथा कतिपय आन्दोलनहरु अदालतसँग सम्बन्धित हुँदैनन्, यी राजनीतिक विषय हुन् । राजनीति विषयलाई राजनीतिक रुपबाटै हल गर्नुपर्छ । सरकारले ढुंगेललाई गिरफ्तार गरेर गम्भीर गल्ति गरेको छ ।’’
त्यसैगरी माओवादी केन्द्रका अर्का नेता गोपाल किराँतीले बालकृष्ण ढुंगेलको जीवन रक्षा र रिहाईको माग गर्ने बताए । उनले भने, “बालकृष्ण ढुंगेल हाम्रो प्रदेश समितिको सदस्य हुनुहुन्छ, उहाँको जीवन रक्षा र रिहाईको माग गर्छौं र पार्टी केन्द्रले तयारी गर्ने संघर्षको कार्यक्रमअनुसार प्रतिरोध संघर्षमा आउन १ नम्बर प्रदेशका कार्यकर्ताहरुलाई आह्वान गर्छ ।’’
माओवादीका केन्द्रका नेता सुरेन्द्र कार्कीले पनि वामपन्थी शक्तिहरुको तालमेलपछि सरकारको आक्रामकता बढेकाले युद्धकालको घटनालाई गिजोल्न खोजेको बताए ।
“वामपन्थी शक्तिहरुको तालमेलपछि सरकारको आक्रमकता बढेको छ, युद्धकालिन मुद्दाहरुलाई हामी बल्झाउन र गिजोल्न सक्छौं भन्ने सरकारको संकेत बढेको छ, नेपाली कांग्रेस पनि शान्ति प्रकियाको प्रमुख हिस्सेदार हो, शान्तिप्रक्रियाबाट ऊ पनि जिम्मेवार रहनुपर्छ ।”
उनले माओवादीका व्यक्तिहरु नै द्वन्द्वकालमा बढी मारिएको बताए ।
“युद्धकालमा कांग्रेसका मानिसहरुभन्दा माओवादीका मान्छेहरु बढी मारिएका छन्,” उनले भने, “कुनै अदृश्य शक्ति आएर माओवादीलाई मारेका होइनन्, कांग्रेसका मान्छेले नै मारेका हुन् । ढुंगेलको स्वास्थ्य स्थिति पनि नाजुक छ, यो अवस्थामा उनको जीवन तलमाथी भयो भने सरकारले छ पनि एउटा अप्रिय स्थिति भोग्नपर्ने हुन्छ ।’’
