काठमाडौं । राष्ट्रिय जनता पार्टी नेपाल र संघीय समाजवादी फोरम नेपालले क्षेत्र बाँडफाँटमा संख्या भाग लगाएका छन् ।
बिजुलीबजारस्थित तमलोपाको पुरानो कार्यालयमा मंगलबार बिहान बसेको बैठकले क्षेत्र बाँडफाँटमा प्रारम्भिक सहमति जुटाएको हो ।
बैठकले प्रतिनिधिसभातर्फ फोरमलाई १७ र राजपालाई १६ सिट रहने गरी भागवण्डा गरेको छ । त्यस्तै प्रदेशसभामा फोरमले ३३ सिटमा उमेदवारी दिनेछ भने राजपाले ३१ ठाउँमा उमेदवारी दिनेछ ।
राजपा महासचिव केशव झाका अनुसार अहिले सिट संख्यामात्रै छुट्टयाइएको छ । कांग्रेससँगको छलफलपछि मात्रै निर्वाचन क्षेत्र बाँडफाँट गरिनेछ ।
कांग्रेससँग तालमेलमा समझदारी कायम भयो भने दुवै दलले अहिले टुंग्याएका सिट घट्नेछ । तथापि बाँडफाँटको अनुपात भने यही हुने उनले जानकारी दिए ।
राजपा स्रोतका अनुसार कांग्रेससँग तालमेलै नभए पनि कन्युनिष्ट गठबन्धन बलियो भएको ठाउँ, शीर्ष नेता उठेका ठाउँमा राजपाले कांग्रेसलाई सघाउने विषयमा सहमति कायम हुन सक्छ ।