काठमाडौं । नेकपा एमालेले टुंगो लाग्न बाँकी प्रदेशहरूमा आज उमेदवार तय गर्ने भएको छ । उमेदवार टुंग्याउन पार्टी उपाध्यक्ष वामदेव गौतम निवास भैँसेपाटीमा स्थायी कमिटीको बैठक बसेको केन्द्रीय सदस्य सूर्य थापाले जानकारी दिए ।

सोमबार बसेको बैठकले सात नम्बर प्रदेशमा उमेदवार टुंग्याएको छ भने आज बसेको बैठकले बाँकी प्रदेशमा उमेदवारी टुंग्याउनेछ ।

“आजको बैठकले सबै उमेदवारी टुंग्याउँछ । बीचमा समानुपातिकतर्फको उमेदवारीले ढिलाइ भएको हो,” उनले भने ।

सोमबार टुंगो लागेका उमेदवारहरू

सोमबारको बैठकले कञ्चनपुर–२ बाट नरबहादुर धामीलाई प्रतिनिधिसभाको उमेदवार बनाउने निधो गरेको छ भने ३ मा दीपकप्रकाश भट्ट उमेदवार बन्ने छन् । १ नम्बर क्षेत्र भने माओवादी केन्द्रको भागमा परेको छ । 

प्रदेशसभातर्फ १ को (क)मा तारा लामा तामाङ र (ख)मा मर्यादा विष्टलाई टिकट दिने निर्णय गरेको छ । त्यस्तै २ को (ख)मा लालबहादुर खड्का र  ३ को (क) मा प्रकाश रावल उमेदवार बन्ने छन् । बाँकी प्रदेशसभा माओवादी केन्द्रलाई छाडिएको छ  । त्यस्तै ५ क्षेत्र रहेको कैलालीमा २ क्षेत्र माओवादीलाई ३ क्षेत्र एमालेलाई बाँडिएको छ । 
जसमा १ नम्बर क्षेत्रमा गरिमा शाह २ नम्बरबाट झपट रावल  र ५ नम्बरबाट नारदमुनि राना उमेदवार बन्नेछन् ।

प्रदेशसभा तर्फ कैलाली– १ (क) मा लालवीर चौधरी, २ (ख) मा  रतन थापा, ३ (ख) मा अम्बर साउद, ४ (ख)मा कृष्णराज सुवेदी र ५ (क) मा नेपालु चौधरी उमेदवार बन्नेछन् ।

डोटीमा प्रेम आलेमगर प्रतिनिधिसभाको उमेदवार बन्नेछन् । त्यहाँका दुईवटा प्रदेशसभामध्ये (क) मा माओवादी केन्द्रलाई छाडिएको छ भने (ख) मा चक्र मल्ल उमेदवार बन्नेछन् ।

अछाम–१ बाट प्रतिनिधिसभामा पार्टी उपाध्यक्ष भीम रावल उमेदवार बन्नेछन् भने अछाम–२ बाट यज्ञ बोगटी उमेदवारले टिकट पाउनेछन् । प्रदेशसभातर्फभने २ को (ख) मात्रै एमालेको भागमा परेको छ । र, त्यहाँबाट बलबहादुर सोडारी उमेदवार बन्नेछन् ।

डडेलधुराको प्रतिनिधिसभा माओवादी केन्द्रको भागमा परेको भने त्यहाँका दुई वटा प्रदेशसभामा (क) मा  पठानसिंह बोहोरा, र (ख) मा डा. तारा जोशीलाई उमेदवार बनाउने एमालेले निर्णय गरेको छ ।

गठबन्धनले पनि सबै उमेदवारी आजै टुंग्याउने

गठबन्धनले पनि आजै दुवै दलको अध्यक्ष बसेर उमेदवारी टुंग्याउने कार्यदलका सदस्य मातृका यादवले जानकारी दिए । उनकाअनुसार मोरङ, काठमाडौँ, उदयपुर र महोत्तरीमा टुंगो लाग्न बाँकी छ । “काठमाडौँकै पनि मिलिसकेको छैन । तलको सहमतिलाई मध्यनजर गरेर उमेदवारी टुंग्याउनुपर्छ । त्यसबाहेक उदयपुर र महोत्तरीका केही क्षेत्रमा टुंगो लाग्न बाँकी छ,” उनले भने ।