काठमाडौं । समानुपातिक सूचीमा बस्न चाहेका कांग्रेस नेता झापा–३ बाट उठने भएपछि कमल थापा नेतृत्वको राप्रपा कांग्रेससँग असन्तुष्ट भएको छ । झापा–३ सहित ७ क्षेत्र राप्रपालाई छाड्नेगरी सझदारी कायम भए पनि झापामा सिटौला प्रत्यक्षतर्फ उमेदवार बन्न लागेपछि राप्रपा रुष्ट भएको हो ।

राप्रपाका प्रवक्ता भुवन पाठकले झापा–३ कांग्रेसलाई छाड्न नसकिने प्रष्ट पारेका हुन् । “झापा–३ सहित ७ क्षेत्र राप्रपालाई दिने समझदारी भएको हो,” उनले भने, “ती क्षेत्रमा सम्झौता हुँदैन ।”

सात क्षेत्रमध्ये पाँच क्षेत्रमा उमेदवार तोकिइसकिएको र बाँकी दुई क्षेत्र बाँडफाँट टुंगो लाग्न बाँकी रहेको उनको भनाइ थियो ।

५ क्षेत्र दिने सहमति !

पाँच क्षेत्रमध्ये झापा–३, मकवानपुर–१, बाँके–२, काठमाडौँ–७, दैलेख–१ टुंगो लागि उमेदवारसमेत तय भएको उनको भनाइ छ । झापा–३ मा राप्रपाका महामन्त्री राजेन्द्र लिङ्देन, मकवानपुर–१ मा अध्यक्ष कमल थापा, बाँके–२ मा ओमप्रकाश आजाद, काठमाडौँ–७ मा विक्रम थापा र दैलेख–१ मा दीपक बहादुर शाहीलाई उमेदवार बनाउने निर्णय भइसकेको उनको भनाइ थियो ।