काठमाडौँ । कम्युनिष्ट गठबन्धनले काठमाडौँमा क्षेत्र बाँठफाँट टुंगो लगाएको छ ।
१० सिट रहेको काठमाडौँमा गठबन्धनले एमालेलाई ७ क्षेत्र र माओवादी केन्द्रलाई तीन क्षेत्र दिनेगरी अनौपचारिक बाँडफाँट गरेको हो । कार्यदलका एक सदस्यकाअनुसार प्रतिनिधिसभातर्फ एमालेको भागमा काठमाडौँ क्षेत्र नम्बर १, २, ३, ४, ५, ७, ९ परेको छ भने ६, ८ र १० माओवादी केन्द्रको भागमा परेको छ ।
प्रदेशसभातर्फ पनि माओवादी केन्दले तीन क्षेत्रमात्रै पाउने भएको छ । क्षेत्र नम्बर १ को ख, ३ को क र १० को माओवादी केन्द्रको भागमा परेको छ ।
गठबन्धनको प्रमुख घटक एमालेले काठमाडौँ क्षेत्र नम्बर ९ बाहेक अन्यत्र प्रतिनिधिसभा सदस्यको उमेदवारी टुंग्याएको छ ।
जसमा प्रदेश नम्बर १ मा एमाले केन्द्रीय सदस्य सावित्रा भुषाल उठ्ने छिन् भने दुई नम्बरमा वरिष्ठ नेता माधवकुमार नेपाल उठ्ने छन् । ३ मा काठमाडौँ जिल्ला अध्यक्ष कृष्ण राई उठ्ने पक्कापक्की भएको छ । केन्द्रीय सदस्य राजन भट्टराईले ४ नम्बर क्षेत्रमा कांग्रेसका गगन थापासँग प्रतिष्पर्धा गर्नेछन् भने ५ मा महासचिव ईश्वर पोखरेल उठ्ने तयारी छ ।
७ नम्बरमा निवर्तमान सभासद रामवीर मानन्धरको चर्चा छ भने ९ नम्बरमा पार्टी उपाध्यक्ष अष्टलक्ष्मी शाक्य र केन्द्रीय सदस्य कृष्णगोपाल श्रेष्ठको उमेदवार बन्ने भन्ने टुंगो लागेकोे छैन ।
यता माओवादी केन्द्रकी प्रवक्ताले भने काठमाडौँमा उमेदवार टुंगो लागिनसकेको बताइन् । क्षेत्र बाँडफाँट सकिएपछि पार्टीले पत्रकार सम्मेलन गरेर उमेदवार टुंग्याउने उनको भनाइ थियो ।