काठमाडौं । भक्तपुरका सदाबहार नेता नारायणमान बिजुक्छे र उनको नेपाल मजदूर किसान पार्टीसँग तालमेल गर्न एमाले–माओवादी गठबन्धन र नेपाली कांग्रेसले प्रयास गरे । तर, आफ्नो अडानमा २० को १९ नहुने बिजुक्छे र उनका सारथीलाई कसैले गलाउन सकेनन् ।
दुवैपक्ष बिजुक्छेलाई एउटा क्षेत्र दिन र अर्को क्षेत्रमा आफूहरूलाई सघाउन उनीहरूको प्रयास थियो । प्रयास सफल नभएपछि अन्ततः कम्युनिष्ट गठबन्धनले क्षेत्र नं १ मा निःशर्त बिजुक्छेलाई सघाउने भएको हो ।
यद्यपी मजदूर किसान पार्टीका नेता प्रेम सुवालले यसबारे आफूहरूलाई जानकारी नभएको प्रतिकृया दिए । यदी गठबन्धनले सहयोग गर्ने निर्णय गरेको भए के गर्ने भन्ने टुंग्गो लाग्ने जानकारी दिए ।
“हामी अझै समानुपातिक सूचीलाई अन्तिम रुप दिन व्यस्त छौं । दुई क्षेत्र कै प्रत्यक्ष उमेदवार टुंग्गिएको छैन,” आइतबार बेलुका बाह्रखरीसँग कुरा गर्दै उनले भने ।
भक्तपुर क्षेत्र नं १ मा भने सो पार्टीका अध्यक्ष बिजुक्छे नै उमेदवार बन्ने निश्चित भैसकेको छ ।
बहुदलपछि भएका सबै निर्वाचनमा विजयी हुँदै आएका उनलाई यो चुनावमा पनि गठबन्धन वा कांग्रेसले रोक्न सक्ने देखिँदैन ।
विगततर्फ फर्केर हेर्दा
भक्तपुर जिल्लाभर नै उक्त पार्टीको वर्चश्व रहँदै आएको छ । २०४८ देखि नै २ क्षेत्र रहँदै आएको भक्तपुरमा १ बाट बिजुक्छे भारी मतले विजयी हुँदै आएका छन् । विगत २७ वर्षदेखि एकछत्र जमाउँदै आएका उनलाई यसपटक पनि हल्लाउन नसक्ने विश्लेषण गर्दै कम्युनिष्ट गठबन्धन उनीसँग घुस्रिन पुगेको देखिन्छ ।
स्थानीय तह निर्वाचन नतिजा
भक्तपुरको क्षेत्र नं १ मा चाँगुनारायण नगरपालिका र भक्तपुर नगरपालिका पर्दछन् । यो क्षेत्रमा मजदूर किसान पार्टीलाई उछिन्न तीन ठूला पार्टीकै मत जोड्नुपर्ने हुन्छ ।
यो क्षेत्रको रहेको भक्तपुर नगरपालिकाका क्लिनस्वीप गरेको र चाँगुनारायणको एक वडा जितेको नेपाल मजदुर किसान पार्टीको पक्षमा २९ हजार २०२ मत प्राप्त गरेको छ । त्यस्तै, चाँगुनारायण नगरपालिकाको मेयर र उपमेयरसहित ४ वडा जितेको एमालेले १३ हजार एक मत, कांग्रेसले पनि चाँगुनारायण नगरपालिकाका ४ वडा जित्दै १४ हजार ३३७ मत ल्याएको छ ।
त्यस्तै कुनै वडा जित्न नसकेको माओवादी केन्द्रले यो क्षेत्रमा ३ हजार ८४७ मत ल्याएको छ । त्यस्तै कांग्रेससँग तालमेल गरेको राप्रपाको पक्षमा ४ हजार ३६४ मत रहेको छ ।
यसको अर्थ बिजुक्छेलाई कम्युनिष्ट गठबन्धन, लोकतान्त्रिक गठबन्धनले हल्लाउन सक्दैनन् । जसले गर्दा उनी कुनै पार्टीसँग तालमेल गर्ने पक्षमा छैनन् ।
यद्यपी आफूहरुले कुनै सम्झौता नगरेको मजदूर किसान पार्टीका सुवालले दाबी गरे । “अहिलेसम्म यसबारे हामीलाई जानकारी छैन । यदी त्यस्तो जानकारी आयो भने पार्टीले बैठक बसेर आवश्यक निर्णय लिन्छ,” उनले भने ।
यता एमाले बैकल्पिक केन्द्रीय सदस्य तथा चाँगुनारायण नगरपालिकाका मेयर सोमप्रसाद मिश्रले गठबन्धनबाट आधिकारिक जानकारी नआएको बताए ।
भक्तपुरका प्रतिनिधिसभाका दुबै क्षेत्र एमालेको भागमा परेको थियो भने प्रदेशसभाका २ (ख) माओवादीले र प्रदेशका ३ क्षेत्र पनि एमालेले लिने सहमति भइसकेको छ ।
मिश्रले जिल्लाबाट सबै उमेदवार सर्वसम्मत रुपमा सिफारिस गरेका गरिएको जानकारी दिए । जसमा प्रतिनिधिसभातर्फ क्षेत्र नं १ बाट प्रेमकुमार श्रेष्ठ, क्षेत्र २ बाट महेश बस्नेतलाई सिफारिस गरेको छ ।
त्यस्तै, क्षेत्र १(क) बाट हरिशरण लामिछाने, १(ख) बाट रामेन शिलाकार, २(क) बाट राजेन्द्र राजथला र २(ख) बाट बजन देउजालाई सिफारिस गरेको थियो । क्षेत्र २(ख) माओवदीको भागमा परेकाले देउजा पछाडि हट्ने छन् ।
कम्युनिष्ट गठबन्धनले बिजुक्छेलाई निःशर्त समर्थन गरेर क्षेत्र १ (क) वा दुई नम्बर क्षेत्रमा उनको पार्टीको समर्थन पाउने अपेक्षा गरेको देखिन्छ । तर, त्यसको पछाडिको भित्री कारणमा कम्युनिष्टको बहुमत ल्याएर सरकार बनाउने सपना बोकेका उनीहरूले सरकार गठनका बेला बिजुक्छेको साथ पाउने आशा पालेका हुन सक्छन् ।
यता कांग्रेसका उमेदवार भने भक्तपुरका कुनै पनि क्षेत्रमा आइतबारसम्म टुंगिन सकेको छैन । क्षेत्र नं २ बाट २०४८, २०५४ र २०७० मा भने कांग्रेस उमेदवार विजयी भएका थिए ।
फाइल तस्बिर