कञ्चनपुर । आगामी मंसिरमा हुन गइरहेको दोस्रो चरण अन्तर्गतको प्रतिनिधि सभा र प्रदेश सभा चुनावका लागि सत्तारुढ नेपाली कांग्रेसले निर्वाचन गतिविधि अघि बढाएको छ । 

कञ्चनपुर निर्वाचन क्षेत्र नं २ बाट प्रतिनिधि सभाको उम्मेदवारमा केन्द्रीय सदस्य एनपी साउद र निर्वाचन क्षेत्र नं ३ मा अर्का केन्द्रीय सदस्य रमेश लेखकलाई उम्मेदवार बनाएसँगै कांग्रेसले जिल्लामा चुनावी प्रचार–प्रसारलाई अघि बढाएको हो । प्रदेश नं ७ सँगै राष्ट्रिय राजनीतिमा राम्रो पहिचान बनाएका नेताद्वय साउद र लेखकले उम्मेदवारको टुंगो लाग्नुअघि देखि नै आ–आफ्नो निर्वाचन क्षेत्रमा दौडधूप सुरु गरिसकेका थिए । 

कांग्रेस कञ्चनपुरका सभापति हरिप्रसाद बोहराले जिल्लाका तीन वटै निर्वाचन क्षेत्र र प्रदेश सभा निर्वाचन क्षेत्रमा प्रचारप्रसारको जिम्मेवारी बाँडफाँड गरेर जिल्ला सदस्यलाई खटाइसकेको जानकारी दिए । त्यसका साथै भ्रातृ संगठन परिचालनका लागिसमेत कांग्रेसले नेतालाई जिम्मेवारी दिइसकेको छ । 

२०७० को दोस्रो संविधान सभा निर्वाचनमा कञ्चनपुरका चार वटै निर्वाचन क्षेत्रमा कांग्रेसले जितेको थियो । अघिल्लो पटकको जित परिणामलाई कायम राख्न कांग्रेस नेता सक्रिय भएर लागेका छन् । 

त्यसैगरी, नेकपा एमाले र नेकपा माओवादी केन्द्र सम्मिलित कम्युनिष्ट गठबन्धन भने कञ्चनपुरको निर्वाचन क्षेत्र बाँडफाँड कै विषयमा छलफलमा अल्झिएको छ । कञ्चनपुरको निर्वाचन क्षेत्र नं १ लाई एमाले र माओवादीले आ–आफ्नो दाबी गर्दै छाड्न नचाहेकाले जिल्लामा उम्मेदवार टुंग्याउन ढिलाइ भएको हो । एमालेका उपसचिव रणबहादुर महराले कञ्चनपुरका तीन मध्ये दुईवटा निर्वाचन क्षेत्र एमाले र एउटा निर्वाचन क्षेत्र माओवादीलाई दिने शीर्ष तहमा सहमति भइसकेको जानकारी दिए ।  

‘‘निर्वाचन क्षेत्र नं १ माओवादीलाई दिने भन्ने भएको छ,’’ एमाले उपसचिव महराले भने, ‘‘निर्वाचन क्षेत्र नं २ र ३ एमालेको भागमा परेको छ ।’’ उनका अनुसार निर्वाचन क्षेत्र टुंगो लागे पनि उम्मेवारको टुंगो लाग्न सकेको छैन । 

त्यस्तै माओवादी केन्द्रका जिल्ला संयोजक वीरबहादुर थापाले निर्वाचन क्षेत्र नं १ माओवादीको भागमा परेको आधिकारिक घोषणा नभएको बताएका छन् । ‘‘हामी आधिकारिक घोषणाको पर्खाइमा छौं,’’ संयोजक थापाले भने । निर्वाचन क्षेत्र नं १ माओवादीको भागमा परे माओवादीबाट नेतृ बिना मगर उम्मेदवार बन्ने प्रवल सम्भावना रहेको माओवादी स्रोतले जनाएको छ ।