काठमाडौं । नेकपा एमालेका नेता, कार्यकर्ताहरुले प्रदेश सभा र प्रतिनिधि सभा निर्वाचनको टिकट वितरण गर्दा पार्टीमा योगदान दिएकाहरुलाई नभुल्न पार्टी नेतृत्वसँग आग्रह गरेका छन ।
आइतबार बिहानै पार्टी अध्यक्ष केपी ओलीको निवास पुगेका एमाले केन्द्रीय सदस्य निवर्तमान सांसद मोहन बानियाँले टिकट वितरण गर्दा पार्टीमा योगदान दिएकाहरुलाई नभुल्न पार्टी नेतृत्वको ध्यानाकर्षण गराइएको बताए ।
उनले पार्टीका पुराना र पाका नेताहरुलाई टिकट वितरण गरेर जान आफूले सुझाव दिएको पनि स्पष्ट पारे । निवर्तमान सांसद बानियाँ प्रतिनिधि सभा निर्वाचनमा उमेदवारका आकांक्षी हुन् ।
पूर्व मन्त्री एवम् नेकपा एमालेका नेता महेश बस्नेतले टिकट वितरणका विषयमा सुझाव दिइएको बताए । उनले काठमाडौं उपत्यका भित्र टिकट वितरणको विषयमा पार्टी र व्यक्तिमाथि अन्याय गर्न नहुने स्पष्ट पारे ।
एमाले धनुषा क्षेत्र नम्बर ४ का प्रदेश सभा निर्वाचनका उमेदवारका आकांक्षी सितल साहले पार्टीको जित सुनिश्चित हुने गरी उमेदवारी तय गर्न पार्टी अध्यक्ष ओलीलाई सुझाव दिइएको बताए ।
त्यसैगरी धनुषाकै एमाले नेता गुरुदेव यादवले पार्टीलाई चुनावमा जिताउने गरी उम्मेदवारी दिन अध्यक्ष ओलीसँग आग्रह गरिएको बताए । कतिपय एमाले नेताहरुले भने कार्यव्यस्तताका कारण अध्यक्ष ओलीसँग भेट गर्न नसकिएको गुनासो पनि गरेका छन । एमाले पार्टी स्कुल विभागका सदस्य समेत रहेका बाजुराका दयालबहादुर शाहीले आफू प्रदेश सभाको उमेदवारको आकांक्षी भए पनि पार्टी अध्यक्ष ओलीको कार्यव्यस्तताका कारण भेट हुन नसकेको गुनासो गरे ।
एमालेका नेता, कार्यकर्ताहरुले माओवादी केन्द्रलाई हैसियतभन्दा बढि सिट दिएको भन्दै पार्टी नेतृत्वको ध्यानाकर्षण गराउँदै आएका छन । उनीहरुले सबै जिल्लामा माओवादी केन्द्रलाई ४० प्रतिशत दिनैपर्ने अवस्था नरहेको रिर्पोटिङ पनि पार्टी नेतृत्वलाई गर्दै आएका छन ।
