काठमाडौं । नेपाली कांग्रेसका नेता तथा पूर्व भौतिक पूर्वाधार तथा यातायातमन्त्री रमेश लेखकले राष्ट्रियता बलियो बनाएर सबैलाई मिलाएर कांग्रेसको नेतृत्वमा मुलुकको विकास गर्नुपर्ने समय आएको बताएका छन् । 

काठमाडौंमा केही पत्रकारहरुसँगको कुराकानीमा नेता लेखकले अब कांग्रेसको नेतृत्वमा सबै धर्म, जातजाति, भाषा–भाषी र हिमाल, पहाड, तराई–मधेश मिलाएर मुलुकको समृद्धिका लागि विकास गर्नुपर्ने समय आएको बताएका हुन् । ‘‘शान्ति प्रक्रिया, संविधान निर्माण र त्यसको कार्यान्वयन कांग्रेसको नेतृत्वमा भएको छ,’’ उनले भने, ‘‘अब कांग्रेसकै नेतृत्वमा सबै धर्म, जातजाति, भाषा–भाषी र हिमाल, पहाड, तराई–मधेश मिलाएर राष्ट्रिय एकता बलियो बनाउँदै देशको विकास गर्नुपर्ने बेला भएको छ ।’’ 

संघीयता, लोकतन्त्र, गणतन्त्र हुने र सामावेशी चरित्रको राज्य व्यवस्था हुने गरी कांग्रेसको नेतृत्वमा राजनीतिक विषय निष्कर्षमा पुगिसकेकाले अब देशमा विकास र समृद्धिको काल सुरुवात गर्नुपर्ने जिम्मेवारी पनि कांग्रेसको काँधमा आएको उनको भनाइ थियो । १० वर्षे जनयुद्ध, संविधान निर्माणमा लागेका झण्डै ६ वर्ष र संविधान कार्यान्वयनलाई अघि बढाउन लागेको समयले देशमा जनताको अपेक्षा अनुसार विकास निर्माणका काम हुन नसकेको स्वीकार गर्दै लेखकले भने, ‘‘शान्ति प्रक्रिया टुंगिएर संविधान कार्यान्वयन अघि बढिसक्यो, अब विकास र समृद्धिको समय आयो । जसबाट जनतालाई धनी बनाउने बेला भएको छ ।’’  

कञ्चनपुर निर्वाचन क्षेत्र नम्बर ३ बाट प्रतिनिधि सभा सदस्यका लागि आशन्न निर्वाचनमा टिकट पाइसकेका नेता लेखकले कञ्चनपुरलाई त्रिदेशीय नाकाका रुपमा विकास गर्ने नाराका साथ चुनावमा जान लागेको जानकारी दिए । ‘‘पार्टीले टिकट दिइसकेको छ । अब म कञ्चनपुरलाई त्रिदेशीय नाका बनाएर मुलुकको मुहार फेर्ने अभियानका साथ चुनावमा जाँदैछु,’’ उनले भने । 

महाकालीमा चार लेनको पक्की पुल, दोधारा–चाँदनी क्षेत्रमा सुख्खा बन्दरगाह र महाकाली नदीको किनारै किनार महाकाली करिडोर बनाएर चीनको सीमा नाका ताक्लाकोट जोड्ने सडक निर्माण गरेर कञ्चनपुरलाई नेपालकै सबैभन्दा ठूलो त्रिदेशीय व्यापारिक नाका बनाउन सकिने लेखकले बताए । उनले कञ्चनपुरलाई एक दशकभित्रै त्रिदेशीय व्यापारिक नाकाका रुपमा विकास गर्नका लागि महाकाली नदीमा पक्की पुल निर्माणको काम सुरु गरिसकेको बताए । 

महाकाली नदीमा पक्की पुल र दोधारा–चाँदनीमा सुख्खा बन्दरगाह बनाएर भारतको दिल्ली र आसपासका औद्यौगिक क्षेत्रसँग जोडे नेपालमा पनि औद्योगिकीकरणको ठूलो सम्भावना रहेको उनले दावी गरे । नेता लेखकले कञ्चनपुरलाई देशकै ठूलो नाका बनाउन सकिए ७ नम्बर क्षेत्र र समग्र नेपालको आर्थिक समृद्धिले फड्को मार्ने जिकिर समेत गरे ।