काठमाडौं । आगामी मंसिर १० र २१ गते हुने केन्द्र र प्रदेश सभाको निर्वाचनमा एमाले र माओवादी केन्द्रले बाम तालमेलको घोषणा गरेर टिकट बाडफाँटको प्रक्रिया अन्तिम चरणमा पुर्याएका छन् । अधिकांश स्थानमा कुरा मिलेको बताइए पनि केही स्थानमा कुरा मिल्न सकेको छैन ।  

भोजपुर एमालेको पकड क्षेत्र भए पनि माओवादीलाई दिन लागिएको भन्दै एमाले नेता कार्यकर्ताले गुनासो गरेका छन् । २०७० सालको संविधानसभा निर्वाचनमा त्यहाँका दुवै सिट एमालेले भारी मत अन्तरले जितेको थियो । स्थानीय तहको निर्वाचनमा पनि भोजपुरमा एमालेले आफ्नो वर्चश्व कायमै राख्यो । 

सिट बाडफाँट कार्यदलमा रहेका एमाले महासचिव ईश्वर पोखरेलकै अगुवाइमा एमालेले भोजपुर माओवादीलाई दिन लागेको बताइन्छ । एमालेले भोजपुर माओवादीलाई दिएर संखुवासभा मागेको छ । संखुवासभामा जनमतका हिसाबले कांग्रेस पहिलो र एमाले दोश्रो स्थानमा छन् । 

२०७० सालको संविधानसभा निर्वाचनमा पनि संखुवासभाका दुवै सिटमा एमाले पराजित भएको थियो । प्रतिनिधि सभाका लागि भोजपुरबाट एमाले केन्द्रिय सदस्य राजेन्द्र राई र सांसद कृपाशुर शेर्पालगायत नेताहरु सिफारिसमा परेका छन् । पूर्वमन्त्री समेत रहेका एक नम्बर प्रदेशका सहइञ्चार्ज शेरधन राईले मुख्य मन्त्री बन्ने आसमा प्रदेश सभा रोजिसकेका छन् ।

कृपाशुर  पछिल्लो पटक बिभिन्न विवादमा परेका थिए । त्यसैले भोजपुरमा राजेन्द्र राईले टिकट पाउने निश्चित जस्तै भएको थियो । राईले पछिल्ला वर्षहरुमा आफ्नो अधिकांश समय भोजपुरमै बिताइरहेका छन् । भोजपुरमा ओली समूहकै कार्यकर्ता पनि माधव नेपाल समूहका राजेन्द्र राईलाई टिकट दिनुपर्ने पक्षमा लागेको बताइएको छ । 

२०७० सालको संबिधान सभा र २०७४ सालको स्थानीय तह निर्वाचनमा प्राप्त गरेको मतका आधारमा सिट बाडफाँट गर्ने सहमति एमाले र माओवादीबीच भएको थियो ।