काठमाडौं । प्रधानमन्त्री शेरबहादुर देउवाले माओवादी मन्त्रीहरूलाई जिम्मेवारीबाट हटाउँदै मन्त्रिपरिषद् हेरफेर गरेका छन् । प्रधानमन्त्री देउवाले गृह, परराष्ट्र, सामान्य प्रशासन, पशुपंक्षी विकास, विज्ञान तथा प्रविधि, शान्ति तथा पुननिर्माण मन्त्रालय आफैसँग राखेका छन् ।
त्यस्तै माओवादीकै भागमा रहेको उर्जा मन्त्रालय यसअघि उपप्रधानमन्त्री नियुक्ति गरिएका राप्रपा अध्यक्ष कमल थापालाई दिएका छन् ।
देउवाको सचिवालय स्रोतकाअनुसार राप्रपा प्रजातान्त्रिकका दिपक बोहोरालाई स्वास्थ्य, जयन्त चन्दलाई आपूर्ती, दिलनाथ गिरी सहरी विकास, विक्रमबहादुर थापालाई महिला बालबालिका तथा समाजकल्याण मन्त्रालयको जिम्मा लगाएका हुन् । त्यस्तै कुन्तीकुमारी शाहीलाई शहरी विकास राज्यमन्त्रीको जिम्मेवारी तोकेका छन् ।
माओवादी नेताहरुले परराष्ट्र, गृह, स्वास्थ्य, उर्जा लगायतका मन्त्रालय सम्हालेका थिए ।त्यसैगरी भास्कर भद्रालाई ऊर्जा राज्यमन्त्री, कान्ता भट्टराई महिला, वालवालिका तथा समाज कल्याण राज्यमन्त्री र सुशील श्रेष्ठ आपूर्ति राज्यमन्त्रीको जिम्मेवारी दिइएको छ ।