काठमाडौं । नेकपा माओवादी केन्द्रका संसदीय दलका उपनेता टोपबहादुर रायमाझीले सरकारमा रहेका आफ्ना पार्टीका मन्त्रीहरु विना विभागीय भएपनि सरकार नछोड्ने र निर्वाचनसम्म साथ दिने प्रतिबद्धता जनाएका छन् ।
सोमबार रिपोर्टर्स क्लब नेपालले आयोजना गरेको साक्षात्कारमा बोल्दै नेता रायमाझीले भने, “हामी र कांग्रेसवीच भएको प्रतिबद्धता अनुसार नै हाम्रा मन्त्री साथीहरु सरकारमा रहनुहुन्छ, अब जहाँसम्म प्रधानमन्त्री शेरबहादुरजीले के गर्न खोज्नुभएको हो, त्यो चाहिँ बुझिएन । उहाँले निर्णय लिनुभयो भने हामी पनि त्यही अनुसार निर्णय लिन्छौं, अहिलेलाई हामीले निर्वाचनसम्म साथ दिने निर्णय गरेका छौं ।”
नेता रायमाझीले आफ्ना पार्टीका मन्त्रीहरुले विना विभागीयकै रुपमा भएपनि प्रदेश र प्रतिनिधि सभाको निर्वाचनसम्म साथ दिने विश्वास दिलाए । उनले थपे, “हामी त सहमतिबाट एक इन्च पनि तल हुँदैनौं, तर प्रधानमन्त्रीले धोका दिनुभयो । उहाँले गलत गर्नुभयो ।”
उनले विचार र सिद्धान्त मिल्ने पार्टीहरुवीच धुव्रीकरण हुनु खुशीको कुरा भएको धारणा राखे । उनले भने, “वामपन्थी विचार धारा बोकेका पार्टीहरु मिल्नु खुशीको कुरा हो, यो मेरो लागि गर्वको विषय हो, यो राष्ट्रले अब एक सय वटा पार्टी धान्न सक्दैन, न त जनताले नै धान्न सक्छन् ।”